NAMATIKDAN karon sa kapulisan nga daghan mga drayber og motorsiklo ang gahi og ulo tungod kay mopadagan gihapon sa ilang sakyanan bisan og kuwang sa mga kahimanan sama sa suga ug uban pa.

Nagpahimangno karon ang kapulisan sa probinsya sa Davao del Sur nga likayan ang pagpaspas og padagan diha sa kadalanan ilabi pa kung wala masuheto sa dalan.

Kini gumikan sa kamatayon sa usa ka drayber nga si Jervis Delgado, taga Palamos Compound kinsa aksidenteng nabanggan sa usa ka international harvester tractor truck (plate number USN-842) samtang naguyod sa trailer nga nagbaton sa plakang LORN-109 nga kargado og semento.

Sa tahong nahipos sa Sun. Star Superbalita gikan sa traffic section sa Hagonoy Police Station, gikataho nga mga alas 2:30 sa sayong kabuntagon, Dominggo, gimaneho ang trak ni Jennifer Garbo, 29 ug taga Block 26, Lot 14, Sarangani Homes, San Isidro, dakbayan sa General Santos.

Samtang nahidangat na kini sa Barangay Guihing, Hagonoy, gikasugat niini ang kolor itom nga Honda Wave, diin gawas nga way plaka, wa sab kini suga sa atubangan (head light).

Wa makabantay si Garbo sa maong motor mao nga aksidenteng nabanggaan gyud kini sa trak, subay ni PO3 Marie Aznar, nag-imbestiga sa nahitabo.

Nangalagpot sa semento ang mga sakay sa motor nga sila si Marvin Baba, lumolupyo sa Crossing Aplaya, Guihing ug Jimboy Diaz, taga Gilda Subdivision sa Barangay Guihing.

Nahiagom og mga pangos ug bun-og sa ilang kalawasan ang mga angkas sa motorsiklo gidali sila paghatod ngadto sa Davao del Sur Provincial Hospital.

Apan ang drayber nga si Delgado, kinsa na-grabehan sa nahitabo, ang gilayong gibawian sa kinabuhi mao nga didto na lang kini gidala sa Angel Funeral Parlor sa siyudad sa Digos.

Nilutaw sa imbestigasyon ni Aznar nga padong Gensan ang trak aron maghatod og semento samtang gikan sa Hagonoy ang maong motorsiklo.

Sa nahitabo, ang kapulisan nagkanayo nga wa sila magkulang sa pagpahinumdom sa tanang drayber nga magmaneho diha sa kadalanan apan di kalikayan nga di sila paminawon mao nga kanunay mahitabo ang aksidente sa dalan. (Orlando B. Dinoy)