PATAY ang nagmaneho sa motorsiklo human mabangga luyo sa trak nga naghunong sa tunnel sa South Road Properties (SRP), dakbayan sa Sugbo, pasado alas 2:00 kagahapon sa kaadlawon.
Atol sa aksidente, di makita ang ilawom sa tunnel human matagak ug nabusbos ang pipila ka sako nga semento diin karga sa trak.
Ang namatay giila nga si Cristopher Lumanta, taga Punta Prinsesa ug kawani sa usa ka mall luwan sa motorsiklo nga may plate number GF 44177.
Si Lumanta mibangga sa lubot sa flat bed truck nga may plate number HUA-643 nga gimaneho ni Junard Pasigna nga taga Tres de Abril, siyudad sa Sugbo.
Ang trak nagkarga og liboan ka sako nga semento ug ihatud unta sa bodega paingon sa norte.
Pasiunang imbestigasyon ni PO3 Noel Belecario sa Traffic Division nga nagdagan sa susama nga direksyon ang biktima ug ang trak gikan sa South ug mopaingon sa Norte.
Ang trak nag-una apan pagdayon sud sa tunnel natagak ang pipila ka sakong semento ug nangabusbos ang semento nga nanglupad ug nakahatag og kangitngit sud sa tunnel.
Ang drayber nga si Pasigna mihunong sa outerlane sud sa tunnel ug iyang gisusi ang nangatagak nga semento.
Si Lumanta nga nagsunod, wa makakita sa trak nga naghunong ug mibangga lubot sa truck.
“Zero visibility gyud, mismo ang suga nga blinker sa mobile nga nagresponde di gyud makita,’ matud ni Belecario.
Daling naabot ang ambulansya ug gidala ang biktima sa tambalanan ug gideklarar nga dead of arrival (DOA). (JFT)