Duterte giila nga ika-5 nga gisaligan sa mga Filipino

Sunday, March 14, 2010

ANG labing respetadong magazine sa tibuok kalibutan nga Reader's Digest nag-ila kang Davao City Mayor Rodrigo Duterte nga ikalima nga politiko nga gisaligan sa mga Pilipino ug ika-47 nga gisaligan sa katawhan sa tibuok Asya.

Sa programa sa telebisyon nga "Gikan sa Masa, Para sa Masa" sa ABS-CBN kagahapon, ang mayor nagbutyag nga iyang gidawat ang maong pasidungog sa dakong pagpaubos sa iyang kaugalingon.

Have something to report? Tell us in text, photos or videos.

"I accept it with all humility. Mas maayo nang laing tawo ang mosulti sa maayong binuhatan," ni Duterte dihang gipangutana ni Konsehal Mabel Acosta.

Si Acosta, program co-host sa mayor, napili usab nga usa sa "Ten Most Outstanding Councilors of the Philippines" (TOCP) nga gipasiugdahan sa Junior Chamber International (JCI) Philippines.

Si Acosta maoy napili niadtong Marso 12 didto sa Cebu nga usa sa napulo ka mga konsehal nga pasidunggan sa TOCP para 2009.

Si Duterte maoy nag-inusarang politiko sa Mindanao nga gipatik sa Reader's Digest nga ikalima nga opisyal sa gobyerno nga gisaligan sa katawhang Pilipino.

Atol sa programa sa tebelisyon, gipakita ang kopya sa Reader's Digest nga dunay titulo nga "Philippines Who Do You Trust?" nga nagpatik sa mga tawo nga dunay nahimo nga kaayohan sa katilingban.

Sa kategorya sa mga politiko, nag-una sa listahan mao sila Senator Benigno "Noynoy" Aquino, Ralph Recto, Roxas, Mayor Alfredo Lim ug nagtabla sa ikalima sila Duterte ug Senator Richard Gordon.

Ang pasidungog nga nadawat ni Duterte sa Reader's Digest maoy nahimong basehan niya sa pagsaway kang House Speaker Prospero Nograles kinsa nag-akusa kaniya nga dunay anomalya sa City Hall.

Si Duterte naglakbit sa performance rating ni Nograles isip Speaker of the House nga mitala lamang og "negative 43 percent" sigun sa labing uwahing survey.

"Ikaw Karlo, kung tigas imong papa, siya unta naa diri?," ni Duterte nga naggunit sa kopya sa Reader's Digest atubangan sa telebisyon.

Ang mayor nagsaway kang Nograles nga 'kurakot' pinaagi sa pagsulti nga "kung dili pa kurap imong papa, siya unta ang nabutang diri!," subling gipakita sa mayor ang kopya sa Reader's Digest. (AD)