NILANDING sa balay tambalanan ang empliyado sa gobiyerno human gilabnihan sa duha ka mga suspetsado nga sakay og motorsiklo.

Gidali pagdala sa Northern Mindanao Medical Center (NMMC) si Fatima Madlos, 48, empliyado sa City Hall ug taga Bayabas ning siyudad sa Cagayan de Oro.

Sa rekord nga natala sa Police Station 1 (PS1) sa Divisoria, nasayran nga nagbaklay si Madlos sa dalan Rizal-Hayes mga alas 8:30 sa gabii ug gikan pa kini nag-withdraw sa ATM.

Kalit lang nga nipidpid ang usa ka motorsiklo ug gibira ang iyang bag sa sakay niini.

Tungod kay hugot ang gihimong pagpugong sa biktima naguyod kini hinungdan sa pagkasamad ug pagkapangos sa tiil niini ug tuo nga braso.

Nakuha sa duha ka suspetsado ang iyang kwarta nga gisulod sa bulsa sa bag nga mobalor og P4,900.

Dali nga gidala sa NMMC ang biktima sa mga nakaresponde ug nagpaalim pa sa samad nga naangkon niini ning panahona.

Ang kapolisan sa PS1 nibutyag sa Sun.Star Superbalita nga posibleng gisubay-bayan na si Madlos samtang nag- withdraw pa lamang kini ug hinay-hinay nga gisunod sa mga suspetsado.

Dugang sa kapolisan human nahilom ang pipila ka pagpanulis nibalik na usab kining bag-ong modus nga mosakay na lamang ang suspetsado ug mamira og mga bag.

Hinuon, sa pagsulat ning balita gisubay na sa kapolisan ang maong kaso aron sa pagsikop sa mga suspetsado.