Sa ikaduhang higayon nakaangkon na usab og kaparutan ang dakbayan sa Davao sa dihang gibasura sa Court of Appeals (CA) ang motion for reconsideration nga pag-ban sa aerial spraying ug sa ikaduhang higayon mipabor sa pro aerial spray ang Pilipino Banana Growers and Exporter Association (PBGEA).

Ang gibasihan sa dakbayan sa Davao sa pagduso ngadto sa korte nga i-ban ang aerial spray sa mga banana plantation dinhi sa atong siyudad mao ang City Ordinance 0309-07 nga gi-aprobahan sa atong Konseho niadtong bulan sa Pebrero 2007.

Kini gipasikad usab sa mga singgit-singgit sa mga grupong militante nga dunay daghang mga tawo nga nadaut ang ilang maayong panglawas gumikan sa chemical nga gigamit sa aerial spray.

Dunay mga konsehal nga atong gihinabi, sila mismo kombinsido nga walay mga tawong napuwerhisyo ang ilang panglawas gumikan sa aerial spray, kon nganong ilang giaprobahan ang maong ordinansa, tungod kay gihangyo sila sa usa ka tawo nga dili gyud nila mahimong kabalibaran.

Ang mga tawo usab nga atong makita kanunay nga mag-martsa sa atong kadalanan dili usab mga lumulupyo duol sa plantasyon sa saging, gigamit lang sila sa mga maayong laki, doctor, ug abogado nga siguro gustong madato sa mga dolyares nga funding gikan kuno sa "OXFAM NORBID" Netherland.

Dili pod nato sila mabasol kay basin og wala na sila mokita sa ilang pagpraktis, mao nga mogamit na lang sila'g mga tawo nga inosente sa isyu aron lang sila mo-asenso. Ang pinakasakit pa gyud kay dili taga Davao kining mga tawhana, kasagaran kanila taga Manila.

Dugay-dugay pa mahuman kining kasuha kay mosangko pa kini didto sa Korte Suprema, gani midangat na kini sa ubos balay balauranan alang sa congressional inquiry gumikan sa pag-lobby niining grupoha. Manghinaut lang kita nga ang atong ubos balay balauranan ug ang atong labaw nga hukmanan dili unta ma-impluwensiyahan ug ang mogawas mao ang kamatuoran.

Kay kon mosipyat, mahugno ang usa ka industriya nga dako na'g natabang sa atong ekonomiya sa nasud ug labaw sa tanan libuan ka mga tawo ang mawad-an og trabaho gumikan sa sayop nga pakigbisog ug pagtuo.

Paminawa ang Kontra Balanse sa dxKT 1071 sa dial sa inyong mga radyo, alas 6 hangtud sa alas 7 sa buntag, Lunes hangtud sa adlawng Sabado.