Genoguin: Bomba, bomba kang kinsa ka?

Thursday, March 4, 2010

Samtang nagkaduol ug nagkayo-kayo na ang dagan sa pamolitika sa atong dakbayan sa Davao, awhag lang nato sa atong mga politiko kon pagpa-gimik man ayaw lang intawon ninyo gamita ang bomba, kay intawon dili kabayran og usa ka libo ug siete mil ang kakurat intawon sa mga kawani sa City Hall ug Sanguniang Panglungsod niadtong Pebrero 25, nga may nakit-ang bomba sa comfort room sa mga babaye sa silong sa City Hall.

Kay ang mga sibilyan wala mana'y labot sa inyong pamolitika. Matud pa sa hanas nga tighimo og bomba, dili tuyo nga mopatay og tawo ang tumong sa pagtanom sa maong bomba, tungod kay walay sharpnels nga mao gyuy mokutlo og kinabuhi.

Have something to report? Tell us in text, photos or videos.

Sa atong pag-analisar, aduna la'y isyu nga gustong i-divert. Una, matud pa sa daghang anggulo gusto lang mawaling ang atensiyon sa mga tawo nga dili moadto sa Mayoralty forum nga gihimo didto sa Ateneo de Davao University nga gipasiugdahan sa mga magpapatigayon sa Davao ug mga kapunongan sa mga abogado sa atong dakbayan kinsa miyembro ang atong halangdong bise mayor nga si Inday Sara Duterte.

Kun ngano nga wala siya moadto, siya ra usab ang makatubag sanglit wala man siya mohatag og rason.

Ikaduhang anggulo, gusto lang daw mobalik ang halangdong mayor nga si Rodrigo Roa Duterte sa pagsuperbisar sa atong kapulisan.

Sa ato pa, kon wala ang atong mayor, inutil ang atong mga pulis, dili makasulbad maginagmay man o dinagkong krimen sa atong dakbayan, labi pa nga duna kunoy kidnapping nga wa gyuy kasayuran ang atong kapulisan. Kaluoy pod tawon ninyong mga polisa mo.

So, matud pa sa gipaminaw nga drama kaniadtong gamay pa ko nga mobalik na ang aktor nga si Diego Salvador. Hinuon kanang tanan puro lang anggulo, puwedeng tinuod ug puwede nga dili, puwedeng duol-duol diha ug puwede sab nga layo ra diha.

Pero usa lang nga segurado ko, dili kadto iya sa mga terorista, kay dili basta-basta kanang mga tawhana magbuhi og bomba kon wa kay daghang kinabuhi nga makalas.

Ikaduha, dili sab angkunon sa City Hall nga iyaha kadto sa terorista kay mogawas man nga inutil sila. Laliman ka P2 milyon kada adlaw ang gigasto para sa peace and order aron lang mamentinar ang kahusay ug kalinaw sa atong mahal nga Davao, unya City Hall na hinuon ang biktima sa bomba? O my God!

Mao nga bisa'g si kinsa pa nga politiko, kadtong hitaboa imo gyung ipahid sa imong kaatbang, pilay palad basi'g dunay motuo.

Pero sa paniid nato mora man og mingaw ug negatibo man ang dating sa mga katawhan, labi pa human sa presscon ni Senior Superintendent Rene Aspera ug Colonel Lactao nga dili tinuod nga gikan sa amahan ug anak sa congressman kuno ang sim pack nga maoy gigamit sa mga suspek sa pagkinontakay aron pabuthon ang maong bomba.

Sayon kaayo ang pag-akusa apan malisud ang pagpruyba.

"Matud sa panultihon sa Tagalog, "Maraming namamatay sa maling akala." Matud pa ang bakak kuno sa tantong balik-balik mahimong tinuod, pero kaniadto ra na.

Karon aduna nay alkontra. Matud pa ang baho kuno bisan pa'g tabunan mo man og yuta ug balas bisa'g pila ka tiil ang giladmon inig sa panahon mohungaw gyud ang tinuod nga baho. Paabuton nato na. Tambag lang nato sa atong mga politiko sa Davao, ayaw namo pagbinata, tigulang namo ug mga abogado pa gyud. Ipresentar lang ang inyong plataporma de goberno ug anaa na sa mga intelehenting mga botante kon kinsay pilion kaninyo. Atong ipatigbabaw ang kagustohan sa katawhan ug dili ang atong kagustohan.

Paminawa ang "KONTRA BALANSE" sa radyo DXKT, 1071 sa dial sa inyong mga radyo, 6-7 sa buntag gikan Lunes hangtud sa Sabado. Ug "KONEKSYON" sa Channel 9, matag Biyernes sa alas 7-8 sa buntag.