Dili pa lang dugay nagpagawas og report ang Department of Finance (DOF) may kalabutan sa nagakadako nga deficit sa atong budget niining 2009, kon diin matud pa sa maong ahensiya sulod sa walo ka bulan gikan sa Enero hangtud niadtong milabayng bulan sa Agusto niining tuiga, pito ka pilo ang atong deficit.

Sa hinapus nga bulan sa Agusto lamang, ang deficit mikabat na ngadto sa P210 bilyones.

Kini misaka ngadto sa 561.5 porsiyento gikan sa P31.7 bilyon ang kakulangon sa budget nga nakita sa susamang panahon niadtong milabay nga tuig 2008.

Ang atong gobyerno migasto na og P949.1 bilyon sulod sa walo ka bulan, samtang ang nakolekta gikan sa Enero hangtud sa bulan sa Agusto P739.1 bilyon lamang.

Ang gihimo sa atong gobyerno karon, mao ang subsob nga pagpangulikta aron makuha ang target collection nga P914.2 para lamang sa bulan sa Septyembre, diin sumala pa nga una matapus kining tuiga gibana-banaan nga moabot ngadto sa P250 bilyon ang atong total deficit.

Tulo na lamang ka bulan ang nahibilin niining tuiga, sa atong pagbana-bana malisud na nga marekober pa ang kantidad nga P250 bilyon aron itapak sa atong deficit, bisan pa'g palihukon sa atong gobyerno ang tanang ahensiya nga may kalabutan sa pagpangulikta og buhis.

Kaniadto nga P70 ngadto sa P80 bilyon pa ang atong deficit, gipatungan sa atong gobyerno ang mga palaliton og 10 porsiyento nga VAT hangtud nga nahimong extended VAT kay gi-apil naman sa pagpangulikta ang mga professional aron lang adunay ikatapak sa deficit.

Apan naunsa bang istoryaha nga nag-anam man hinuon kini kadako.

Adunay tulo ka opsiyon lamang nga mahulipan ang atong deficit, una, manghulam ang atong gobyerno sa gawas.

Ikaduha, mamaligya og mga kabtangan kun "goverment owned controlled corporation."

Ug ang ikatulo, pagpataas og buhis sa bisa'g unsang produkto aron lang ikahulip sa atong dakong lugi. Ila na kining gisugdan karon.

Ang pagpatong og singko sentimos sa short message system (SMS) ngadto sa mga prepaid telecomunication ug ang resulta niini, ilabay gihapon kini sa ato nga adunay mga selpon.

Ekonomista ang atong presidente pero naunsa ba nga mas dako man hinuon ang atong gasto kon itandi sa atong kita.

Kon magkanunay kini, mabangkarote ang atong nasud ug mosamot pa unya sa mosunod pang presidente kay kaluoy sa Diyos sukad masukad wala pa'y presidente nga mibayad og utang kon dili kanunay kining nangutang.

Paminawa ang KONTRA BALANSE sa DXKT 1071 sa dial sa inyong mga radyo, alas sais hangtud sa alas siete sa buntag, Lunes hangtud sa adlaw'ng Sabado.