Giabot og kabalaka ang mga sakop sa Davao City Chamber of Commerce (DCCI) human makita ang dakong baha nga nahitabo sa Metro Manila diin liboan nga mga pamilya ang nawad-an og mga panimalay, midaut og milyones ka pesos nga mga kabtangan nga gipanag-iyahan sa mga pribadong indibiduwal ug kagamhanan, ug mikalas sa gatusan ka mga kinabuhi.

Gihangyo sa Davao City Chamber of Commerce (DCCI) ang lokal nga kagamhanan nga unta hatagan og unang pagtagad ang drainage system, butang nga wala ang dakbayan, hinungdan sa mga pagbaha kon mokusog ang ulan bisan sa mubo nga panahon lamang. Apan sagad natong mabati sa mga pulong nga giluwatan sa atong mayor sa siyudad sa Davao nga walay mosugot nga mga nanag-iyang dagkong luna nga magbaligya sa ilang propedad para sa maong katuyoan.

Walay arang sa gobyerno kon kini molihok alang sa kaayohan sa tanan. Kanang paglihok nga walay maagrabyado nga indibiduwal sama niining mga nanag-iya og dagkong luna dinhi sa atong dakbayan. Kung gikinahanglan na nga gamiton ang porsiyon sa ilang yuta para agian sa dagkong kanal nga buhaton, bayaran kini sa gobyerno sa saktong kompensasyon. Kon ugaling magmagahi ang tag-iya sa yuta sa pagbaligya sa luna nga gikinahanglan sa maong proyekto, ang city  government mahimong mo-file og expropriation proceeding sa korte aron gayud magamit ang gikinahanglan nga luna. Usa kini ka kondisyon nga makita sa likod sa titulo sa yuta. Busa dili diay babag ang rason sa mga nanag-iya'g yuta ang pagbuhat og drainage system aron mahalikay kita sa dakong kalamidad sama sa nahitabo didto sa Metro Manila sa bagyong "Ondoy" ug gidugangan pa gyud ni bagyong "Peping" nga milampurnas sa ubang parte sa Luzon.

Ania na kita karon sa gitawag nga climate change, kinahanglan na seguro ang drainage system sa atong dakbayan.

***

Paminawa ang Kontra Balanse sa DXKT 1071 sa dial sa inyong mga radyo, alas 6 hangtud sa alas 7 sa buntag, Lunes hangtud sa adlawng Sabado. Tan-awa usab ang programang 'Koneksyon' sa RPN channel 9 kada Biyernes alas 7 sa buntag.