Ni Al Genoguin
Kontra Balanse

WALA malilong sa probinsiya sa Davao del Norte ang pag-resign sa batan-ong del Rosario sa administration party, ang LAKAS CMD-KAMPI, nga maoy partido sa iyang amahan nga si Governor Rodolfo del Rosario sulod na sa dugay-dugay nga panahon.

Siya si Anthony Garcia del Rosario o mas naila nga AGR.

Human siya naka-survive sa sakit nga cancer, mibalik siya nga lagsik sa iyang naandang trabaho sa kapitolyo isip sports coordinator ug executive assistant sa iyang amahan.

Nagpatawag gilayon og prescon ang batan-ong AGR ug mideklara nga modagan og congressman sa unang distrito sa probinsiya sa Davao del Norte.

Ang pangutana, nganong mobalhin man siya og partido nga kongtrolado man sa iyang amahan ang politika sa Davao del Norte? Puwede siya modagan nga maoy opisyal nga kandidato sa (LAKAS CMD-KAMPI)?

Kahibulongan tungod kay daghang mga politiko nga nangandoy nga makasulod sila sa administration party, sanglit kompleto kini sa mga makinaryas nga maoy mahimo nilang hagdanan sa kadaugan, apan ang batan-ong AGR mikalas na hinuon sa partido.

Sigurado nga kon mobiya siya sa administration party, oposisyon gyud ang iyang padulngan. Aw, tingali nakapanimaho ang batan-ong AGR nga mas humot karong panahuna ang oposisyon kon itandi sa administrasyon.

Dili sad kita motuo nga dili magbutang og kandidato ang iyang amahan sa Lakas CMD-Kampi. Kon mahitabo kini, ang buot bang ipasabot nga magbangga ang amahan ug anak sa politika sa Davao del Norte karong umaabot nga bugnong lugaynon sa 2010? Imposible.

Dinhi matawo ang atong pagduda. Dili kaha kini sinyales nga mag-oposiyon si Governor Rodolfo del Rosario ug ang iyang batan-ong anak maoy gipa-una didto, ug mosunod siya inig-abot na sa panahon?

Tinuod gyud nga makalibog kining politika. Hinuon, taas-taas pa ang panahon una moabot ang 2010 eleksiyon.

Mga taga Davao del Norte atangi na lang ninyo kay ang daghang mga pangutana matubag ra na inig-abot sa tukmang higayon.

Sa Mount Diwata
Nagkahimamat ni Franco Tito, barangay kapitan sa Mount Diwalwal, Monkayo, Compostela Valley Province sa milabay nga semana.

Akong nahibaw-an gikan niya nga duna nay tunghaan sa kolehiyo ang iyang barangay ug mao ang "Mount Diwata College Art and Science technology”.

Talagsaon kini nga barangay sa tibuok nasud, labi na nga barangay mismo maoy nagsuweldo sa mga magtutudlo. Kaya kaha nimo kapitan? Sigun sa kapitan, kuwalipido na daw ang iyang barangay nga mahimong Lungsod, problema lang kay dili mosugot ang mga miyembro sa Sangguniang Bayan sa Monkayo. Natural na kap, kay mawad-an sila og income. Hulata na lang inig-abot na sa panahon. Ayaw lang pugsa kay basi mahibalik na pod unya sa pagka-barangay.

Paminawa ang KONTRA BALANSE sa Radyo DXKT 1071 sa dial sa inyong radyo. Mabati gikan sa alas 6 hangtud sa 7 sa buntag gikan adlawng Lunes hangtud Sabado.