Genoguin: Inambakay sa partido politikal nagsugod na

Thursday, January 21, 2010

Sa politika bisan kon popular ka pero wala kay kuwarta layo ka ra sa kadaugan. Mao nga karon pa lang daan, maniid ka na kon kinsay mga presidentiable nga kuwartahan didto ka mo-ambak.

Si Konsehal Danilo "Danny" Dayanghirang gikan sa partido nga walay kangho, ang PDP LABAN, mi-ambak siya ngadto sa Liberal Party sa pagtuo niya nga siya ang madala ni Mayor Rodrigo Duterte pagka-congressman sa Ikaduhang Distrito.

Have something to report? Tell us in text, photos or videos.

Apan sa dihang mideklara ang mayor nga si Lawyer Mylene Garcia ang suportahan niini mi-ambak na usab ngadto sa Nacionalista Party ni Senador Manny Villar.

Kuwartahan si Villar, laliman ka mogasto og P47,000.00 kada adlaw sa iyang infomercial? Busa dili imposible nga daghang mga politiko mo-ambak ngadto kaniya.

Si Senador Benigno "Noynoy" Aquino III nagsalig lang sa ka-popular sa iyang mama Cory, ug tatay Ninoy Aquino Jr. mao nga P4,000.00 lang usa iyang gastuhon kada adlaw sa iyang infomercial, bahala na'g walay kuwarta basta sikat o popular. Nakuyawan na gani siya karon kay hapit hi-apsi ni Villar sa sunod-sunod nga survey.

Matud pa ni Konsehal Danny Dayanghirang, bisan kon tua na siya sa laing partido si Mayor Rodrigo Duterte ug Inday Sara Duterte pa gihapon ang iyang suportahan.

Tinuod kaha na Dan? Ang akong na-obserbahan halos sa tanang mga politiko isig palusot na lang. Panahon sa kampanya, mo-ingon sa mga botante bahala'g kinsay inyong mayor basta siguroa lang ko ninyo pagboto.

Mao nay kampanya sa politiko inig abot na sa ultima ora tungod kay dunay panultihon nga "NO SUBTITUTE OF VICTORY". Kaya kaha sultihan ni Dayanghirang ang mga botante nga kon dili mo moboto kang Rody ug Sara Duterte ayaw na lang sad ko ninyo iboto? Unya ang mayor ang iyang kaatbang maoy ikampanya, OH MY GOD pagka-martyr ni Danny.

Dili na lang ta magpa-atik-atik pa. Atong dawaton ang reyalidad sa politika kon dili ka makakampanya nako, dili ta sad ka ikampanya.
Ang lain pang reyalidad sa politika, ayaw pag-loyal sa politiko nga gamiton ka lang ug walay kuwarta nga ihatag nimo. Ano ka hello? Ambak na mintras may panahon pa kay basi'g ugma ulahi na.

Ang katapusang hanig sa politiko aron modaug mao ang kuwarta. Busa wala masayop si Dayanghirang nga mi-ambak sa Partido Nacionalista.

Goodluck Dan, paningkamot kay medyo bitay ka kaayo ni Konsehal Diosdado Mahipus kay iyang pangalan ang kanunay malitok sa mga tawo kon pangutan-on kon kinsay ilang paboritong congressman.

Paminawa ang "KONTRA BALANSE" sa radyo DXKT, 1071 sa dial sa inyong mga radyo. Ug ang "KONEKSYON sa Channel 9.