Genoguin: Mga konsehal nasaag sa adwana

Thursday, March 18, 2010

MISANGKO sa konseho ning atong Dakbayan sa Davao ang bangayan sa Bureau of Customs (BOC) ug Aquarius Container Yard (ACY) tungod lang sa misdeclaration sulod sa 40 ka vans sa may Sasa wharf ning atong siyudad sa Davao.

Ang ACY nga gipanag-iyan ni Rodolfo Reta, adunay (MOA) Memoramdum of Aggrement tali sa Bureau of Customs nga didto sa ilang yarda himuon ang X-ray examination sa mga container vans gikan sa gawas ug sulod sa atong nasud, ug kini nga kasabutan balido hangtud karon.

Have something to report? Tell us in text, photos or videos.

Mipalag ang BoC sa dihang adunay namatikdan si Rodolfo Reta, tag-iya sa ACY nga may mga misdeclaration sa mga papeles, talcum powder ug construction material, apan ang aktuwal nga sulod mga sinako nga bugas.

Dinhi na nagsugod ang tug-of-war sa BoC ug ACY, sa dihang mitawag ang barangay kapitan sa Sasa nga si Mario Reta sa atong mga konsehal ug gitaho nga adunay mga vans sulod sa ACY jurisdiction nga adunay misdeclared goods.

Ang mga konsehal pod, ambot ug unsay nakaon miadto gilayon sa Sasa. Ug matud pa sa pag-abot kuno didto, mora'g si kinsang hari-a nga mimandar nga abrehan ang maong van. Ang mga konsehal nga miadto didto, mao kining mosunod:
Nilo Abellera, Danilo "Danny" Dayanghirang, Pilar Braga, Samuel Bangoy, Tomas Monteverde III ug Leo Avila.

Maoy hinungdan nga atol sa privilege hours niadtong session niadtong Marso 2, gipahagingan ni Konsehal Diosdado Angelo Mahipus ang iyang mga kauban nga dili manghilabot sa trabaho sa adwana tungod kay aduna kana silay kaugalingong balaod o customs tarrif law nga gisunod sa BOC.

Ang ACY nasaag usab sa pagtawag. Kon aduna man sila'y katahap nga nakigkunsabo ang BoC sa mga ismagler, motawag unta sila og laing ahensiya sa atong gobyerno sama sa National Bureau of Investigation (NBI). Dili ang mga konsehal kay wala sila'y police power, o gahum sa korte nga magmando sa pagbukas sa usa ka van kay mahimo silang kataw-anan tungod kay dili kana ilang trabaho.

Kon nagpakabana sila, matud pa sa usa ka konsehal, aron dili masubli ang nahitabo niadtong milabayng bulan sa Disyembre nga may nakuha nga high grade cocaine gikan sa usa ka basiyong van, okay naa na ta diha.

Apan dili sila ang mangunay sa pag-adto didto aron mag-inspection. Isip lokal nga legislator, kon may katahap kamo sa pangulo sa BOC, nganong dili ninyo dapiton diha sa Konseho "in aid of legislation" kay mao man kanay inyong trabaho.

Matud pa's nakasaksi nga taga Sasa, abi nila'g adto mo didto mag-session kay daghan man mong mga konsehal nga miadto didto.

Sige na lang kay nahinaykan man, sa sunod manghinaut kita nga dili na masaag ang atong mga halangdong konsehal didto sa adwana. Maoy paga-ingnon nga "naligaw sa kanilang trabaho".

Okay ra, kay dili man sad mo abogado. Angay sad mo sa pagpasaylo. Sa sunod ayaw na para dili mo mahimong kataw-anan, di ba mga mga konsehal?

Paminawa ang "Kontra Balanse" sa radyo DXKT, 1071 sa dial sa inyong mga radyo, 6-7 sa buntag, Lunes hangtud Sabado. Ug "Koneksyon" sa Channel 9 matag Biyernes alas 7-8 sa buntag.