Genoguin: Mga ordinaryong pulis gilisud-lisud sa ilang superior

Monday, September 6, 2010

MGA hait nga pulong ug pamalikas ang gibuhian ni Bise Mayor Rody Duterte sa iyang programa, "Gikan sa Masa para sa Masa", sa pinakataas nga opisyal sa Philippine National Police (PNP) dinhi sa rehiyon tungod sa dili kuno maayong pagtratar ngadto sa ilang mga "subordinates".

Ang gitumbok sa atong bise mayor mao ang nahitabo sa usa ka pulis nga si SPO1 Panganiban nga gipusil sa usa ka tulisan sulod sa Rural bus didto sa Barangay Tamugan Marilog District sa milabayng semana. Tungod kay naka-uniporme ang pulis ug may armas, dali rang giluthang sa mga armadong tulisan.

Have something to report? Tell us in text, photos or videos.

Post your reaction to the Manila hostage crisis

Sumala sa atong bise mayor nga dili magdala-dala og armas ang pulis bisan pa kon isyu kini sa ila, basta naka- sibilyan.

Ang pinakabug-at pa gyud, kay kon gustuhon sa usa ka pulis nga magdala og armas nga naka-sibilyan kinahanglan pa daw nga molukat og permit to carry (PTC).

Tinuod ba ni Chief Superintendent Pedro Tango? Ug tinuod ba usab Sir, nga pabayron ninyo ang pulis sa permit to carry sa tag-P7 mil (7,000.00) nga naka-memorandum receipt (MR) na man na sa ilaha?

Kon sa bagay, mao ni ang hinungdan nga daghan sa mga magpapatigayon nga dili na lang magtinil og armas kay ang pag-renew sa lisensiya mil kinientos pesos (1,500) lang ang bayad. Pero ang paglukat og permit to carry, aron madala-dala nimo ang imong armas, mobayad ka og P15.000.

Kon mao ning estoryaha, maayo pa'g mga dautang elemento, sama sa Davao Death Squad (DDS), mga tulisan, ug mga New People's Army (NPA) kay mapanalipdan pa nila ang ilang kaugalingon, libre pa silang mopatay kon kinsa'y gusto nilang pamatyon kay wa may problema ang ilang armas sa lisensiya ug permit to carry (PTC).

Ang kapulisan intawon maoy gihigpitan pag-ayo. Nanggugod og mga kriminal, tigpatunhay sa balaud apan gihukasan sa ilang superior og proteksyon sa ilang kaugalingon. Mr. Chief Superintendent Pedro Tango Sir, unsa man ni, imong buot-buot? O balaud gyud ni sa Philippine National Police (PNP) nga imong gisunod? Palihog tubaga.

Pagkaayo ra sa inyong kahimtang, samtang kamong mga dagkong opisyal de bodyguard kon maglakaw-lakaw. Ang inyong mga ordinaryong "subordinates" tangtangan og armas kon mag-off duty, ano kayo sini-suwerte?

Samtang ingon ini ang atong nakita, ari ta sa pikas nga bahin, sa English pa, "The other side of the coins". Wala kini mahisguti sa atong bise mayor, nga dunay mga insidente mga pulis nga gitugtan nga magdala-dala'g armas nga naka-sibilyan pero gigamit sa pagpang hold-up. Ngano, wa may nakaila nga pulis sila, sa laktod nag-abuso. Dunay nahitabo niadtong tuig 2004 nga usa ka pulis gi-back-ride ang tirador. Matud pa nila Davao Death Squad aron pusilon ang usa ka batan-on. Duna say pulis nga nakasibilyan gi-obertikan lang ang iyang sakyanan sa PUJ, gipusil ang drayber. Duna say pulis nga bisa'g dagko'g suweldo mangilkil sa mga pobreng drayber.

Ang nahitabo sa pulis sa Marilog nga gipusil sa tulisan "isolated" sama nga kon may pulis nga mang-hold-up samtang naka-sibilyan "isolated" gihapon. So, tama lang nga adunay (PLEB) Ombudsman, Napolcom aron subaybayan sila. Kay kon dunay abuso bisan adunay PLEB ug Napolcom, misamot pa gyud og wala kining mga buhatan nga maoy mag-imbestigar kanila di ba, Sir?

Paminawa ang "KONTRA BALANSE" sa DXKT, 6 hangtud 7:30 sa buntag, Lunes hangtud Sabado. Alang sa inyong dugang sugyot ug komentaryo pag-email lang sa algenoguin@yahoo.com