Ni Al Genoguin
Kontra Balanse

TUNGOD sa bangi sa duha ka prominenteng politiko dinhi sa atong siyudad sa Davao, daghang mga tawo ang napagan.

Una, kadtong mga tawo nga nagpakahimulos sa Nograles Park nga nahikawan sa pagamit sa maong parke tungod kay gibungkag man kini sa lokal nga gobyerno sa atong dakbayan.

Ikaduha, nangasuspende ang mga tawo nga nagbungkag sa maong parke ug unom ka bulan nga walay suweldo. Kining tanan bunga sa kahigpit sa kompetisyon sa pamolitika.

Ang politika maayo, tungod kay pinaagi ini tunhay ang dagan sa panggamhanan sa yuta, usa ang tumong ug tuyo mao ang pagpangalagad, ug nag-una na dinhi ang paghatag og balor sa dungog ug kinabuhi sa tawo, adunahan man o kabus lakip na ang tawong namolitika isip ehemplo sa katawhan karon ug sa umaabot nga henerasyon kay mamahimo silang unod sa kasaysayan sa umaabot nga panahon.

Kon unsa kadako ang kaayo sa tumong sa politika, mao usab ang kadaut nga mahimo niini kon ang namolitika makalimot sa iyang obligasyong moral sa katawhan tungod sa tawhanong kahakog.

Usahay, dunay mahimong aksiyon nga dili maalinggatan, diin ang mga tawo ra usab sa ilang tugkaran maoy napagan, mga butang nga dili mamatikdan tungod sa mga pabor nga gipatagamtam. Dinhi moabot na sa punto nga ang ilang mga anak mao nay apektado, ug mapasa-pasa pa kini hangtud sa ilang mga apo sama sa nahitabo kang kanhi Presidente Ferdinand Marcos panahon sa Martial Law, tungod sa kahakog sa gahum hangtud karon nakatatak sa mga anak ang negatibong epekto.

2.
Usa ka milyon nga kantidad sa panihapon gikagubtan

HILABIHAN ra gyud nato ka igihan ug sensitibo, butang nga wa pay klaro magkagubot dayon kitang Pilipino. Makadungog lang ta nga migasto og usa ka milyon ka pesos ang presidente sa ilang panihapon didto sa Estados Unidos, mikalampag dayon ta nga wa sa lugar.

Bisan nasayod kita nga dili gikan sa panudlanan atong gobyerno ang kuwarta. Pamati nato nabangkaruta na ta. Gikan sa datu nga congressman sa Leyte ang nagboluntaryo nga siya ang mogasto, patuhuon lang gihapon nato ang atong kaugalingon nga gikan sa kaban sa atong kagamhanan aron lang dunay isyu nga mahimong kuninitan.

Nganong wa man kita mokalampag sa kantidad nga P650 milyon nga nagasto ni Presidente Gloria Macapagal Arroyo sulod sa walo ka tuig na niyang travel sa nagkadaiyang nasud sa kalibutan? Unsa man diay kadako sa P1 milyon kay sa P650 milyon? Tungod kay ang isyu lang panihapon, mao kini ang gina-ingon nga nanghinayang ta sa usa ka sentabo, apan gibaliwala nato ang usa ka libo.
(Paminawa ang tulumanon sa radyo Kontra Balanse sa DXKT 1071 sa dial sa inyong mga radyo. Alas 6 hangtud sa alas 7 sa buntag, Lunes hangtud sa adlaw nga Sabado.)