DILI pa lang dugay mideklara na si Alexander Wangkay alyas Zander Khan nga modagan daw siya pagka-gobernador sa lalawigan sa Davao del Sur.
Si Zander Khan, mayor sa lungsod sa Jose Abad Santos kun JAS, ang pinakahilit ug pinakatumoy nga lungsod sa maong lalawigan. Ug sa atong nahibaw-an, anaa na siya sa ikatulong termino.

Gisuwerte si Zander Khan kay mi-ambak man si Governor Dodo Cagas gikan sa Lakas CMD-Kampi ngadto kang Manny Villar sa Nacionalista Party, ug siya daw kuno ang modala sa administration party sa maong lalawigan. Kana lagi kon winnable siya nga kandidato.

Ang Lakas CMD-Kampi mao ang dominant party karong panahuna ug dili basta-basta nga mokuha og kandidato kon dili dumadaug. Anaa kaha kini kang Zander Khan? Kana ang iyang pamatud-an karon ngadto kang House Speaker Prospero "Boy" Nograles, ang presidente sa Lakas CMD-Kampi.

Ang kasayuran nga atong nahipos, mag-tandem kuno si Zander  Khan ug Bise Gobernador Fely Latasa. Sa atong pag-analisar, mora'g baliktad. Si Vice Governor Fely Latasa ang dapat mag- governor ug si Mayor Zander Khan mao ang mag-vice governor, tungod kay tested na si Latasa nga midaug pagka-vice governor sa tibuok lalawigan, ug si Mayor Zander Khan, mayor  lang sa usa ka gamay nga lungsod ug dili ikalimod nga wa pa siya mailhi sa ubang dapit sa maong probinsiya.

Kon mahinayon, magkatawa si Governor Dodo Cagas kay pabor kini kaniya. 3 corner fight ang mahitabo kay modagan man  daw si Claude Bautista ug pulos gikan sa 2nd district. Kining duha nga si Zander Khan ug si Claude  Bautista, sigurado nga magbahin ang mga boto sa segundo distrito ug hayahay si Gov. Dodo Cagas.

Sa pikas nga bahin, magkaproblema lang si Dodo Cagas kon modayon si Jess Dureza pagdagan og congressman sa 1st District nga maoy moatbang sa iyang anak nga si Congressman Marc Cagas.

Si Jess Dureza taga Hagonoy Davao del Sur ug dili sad basta-basta ang rekord niya. Gawas nga duha ka termino nga nahimong congressman dinhi sa siyudad sa Davao, daghan na'g kasinatian sa natad sa pagpanerbisyo sa atong gobyerno sa nagkadaiyang posisyon. Dinhi karon nato masuta, kon hari na ba gayud sa politika si Governor Dodo Cagas sa Davao del Sur. Kana kon kaya niyang padag-on ang iyang anak, asawa ug pag-umangkon sa naglainlaing politikal posisyon sa Davao del Sur.

Paminawa ang KOTRA BALANSE sa DXKT 1071 sa dial sa iyong mga  radyo, alas 6 hangtud sa alas 7 sa buntag, Lunes hangtud sa adlaw'ng Sabado. Ug tan-awa usab ang tulomanon "KONENSYON" sa C/S TV 9, Biyernes, alas 7 hangtud alas 8 sa buntag.