NAKURAT ang mga katawhan sa ulahing gibulgar ni Senador Panfilo "Ping" Lacson sa iyang privilege speech didto sa hawanan sa Senado mahitungod sa kinatibuk-ang pagkatawo ni kanhi presidente Joseph Estrada, nga gituhoan sa tanan nga maayong laking presidente.

Sa dihang gikasuhan siya og plunder ug nakonbikto, dili gihapon motuo ang mga pobreng masang Pilipino tungod lagi kay alang kanila biktima lang si Erap sa mga kasina sa mga dagkong politiko nga dili makadawat nga usa lang ka artista ug "school drop-out" ang mamuno sa atong nasud. Mao nga gipugos siya pag-abog sa Malakanyang pinaagi sa Edsa 2.

Sa gibulgar ni Lacson nga dili daw ipahunong ni Erap ang sugal nga jueteng kay maayo ra daw kini niadtong mga tawo nga walay trabaho. Kalit nga mitab-ang pag-ila sa mga masang Pilipino ngadto kaniya ug kini nahimong basihan nga pulos tinuod ang mga kaso nga iyang gi-atubang mao nga nakonbikto siya sa Ombudsman.

Sa pikas nga bahin, gikompirma usab ni Alfonso Yuchengco ang gibulgar ni Lacson nga gihurat ni Erap ang dakong negusiyante nga ibaligya niya ang iyang share sa Philippine Long Distance Telephone Company (PLDT) ngadto kang Manuel Pangilinan aron maka-komisyon ang kanhi presidente sa kantidad nga P3 bilyon, sumala sa gikompirma ni Perfecto Yasay, ang kanhi chairman sa Securities and Exchange Comission (SEC).

Ang dugang pang gibulgar sa senador, nga Erap nahimong smuggler og mga dressed chicken gikan sa China ug mga bugas gikan sa Vietnam.

Ang mga depensa ni Senador Jinggoy Estrada ngadto sa iyang amahan, wala makatarog sa kalig-on sa gipangbulgar ni Lacson. Apan sa pikas nga bahin, kinsa man usab kini si Lacson, Mr. Clean ba usab siya nga pagkatawo?

Nahimo siyang tawo ni Erap niadtong bise presidente pa ang naulahi. Si Lacson maoy tuong kamot ni Erap sa dihang gitahasan siya ni kanhi presidente Fidel Ramos sa Presidential Anti Crime Commission (PACC).

Gilambigit si Lacson sa pagpatay sa lider sa Red Scorpion nga dunay involved nga kuwarta. Ug ang rub out sa Kuratong Baliling nga milyon usab ang kantidad sa salapi. Dako og utang kabubut-on si Lacson kang Erap kay dili siya mahimong senador kon wala siya giindosar sa kanhi presidente.

Sa laktod nga pagkasulti, suod nga higala kining duha, kon nganong nagka-init pag-ayo ang ilang panagbangi? Kana kay nanga-ipit na sa Dacer-Corbito case. Mao nga isig palusot na lang ang usa'g-usa kanila ug naglinaglagay na. Dili na hinumdoman ang mga utang kabubut-on pa niining duha ka suod kaayo nga managhigala nga karon nahimo nang mortal nga kaaway.

Paminawa ang KONTRA BALANSE sa DXKT 1071 sa dial sa inyong mga radyo, alas 6 hangtud sa alas 7 sa buntag, Lunes hangtud sa adlaw'ng Sabado.