ANG reklamo sa mga homeowners sa Hillside Subdivision sa Buhangin, siyudad sa Davao batok sa mga opisyales sa usa ka kapunongan midangat na sa buhatan ni Sangguniang Panlungsod Majority Floorleader Danilo Dayanghirang niadtong Lunes.

Ang reklamo gipirmahan sa kapin 90 ka mga homeowners kinsa nangayo og panabang ni Dayanghirang aron tagdon ang ilang suliran mahitungod sa dili gituohang abuso sa mga opisyales sa Hillside Bajada Neighborhood Association (HBNAI), Inc. 

Sila nagkanayon nga ang gihimo sa mga opisyales sa HBNAI nakahasol kanila mao nga ilang gipadangat kini sa konseho aron masulbad sa daling panahon.

Base sa dokumento nga nahuptan sa Superbalita, sila nagkuwestiyon sa
pagpatukod og guardhouse, pagpamaligya og mga sticker sa mga sakyanan ug pagpabayad sa membership and monthly dues.

"The guarhouse was constructed right above the main water pipe of the subdivision. A septic tank was constructed right beside the guardhouse.
What is our assurance that it will not contaminate the main water pipe which is the only source of potable water of the residents?," matud sa ilang suwat reklamo.

Ilang gipaabot usab ang pipila ka mga pangutana bahin sa pagpatuman sa 'No sticker no entry policy'. "Who is the authority in the issuance of car/vehicle stickers? Why is it for sale even to non-homeowners? Is it for security purposes or plain and simple fund raising?," dason nila.

Mga homeowners nga nagpuyo na halus na 20 ka tuig sa ilang balay ug silingan ra usab sa mga opisyal sa HBNAI dili pasudlon sa subdivision kun dili magbilin og valid ID.

Gikuwestiyon sab ang pagpaningil sa mga opisyales sa binuwan nga balayronon pinaagi sa pag-ingon nga: "It was observed that minors were also tasked to collect monthly dues of P50.00 per month per household. Is the membership fee voluntary or mandatory?," sila nagkanayon.

Gawas niini, ila sab gipapadayag ang ilang mulo bahin sa paggamit sa mga opisyales sa association og mga sakop sa Citizen Armed Forces Geographical Unit (Cafgu) sa ilang guardhouse. Mga Cafgu maoy 'tigsita' sa mga homeowners nga way sticker panahon nga mosulod sa maong subdivision.

"The guardhouse has become a beerhouse where people eat, drink liquor, loiter, and hold office anytime," dugang saway sa mga homeowners.

Tungod sa maong mga obserbasyon, mga molupyo wa na makaantus sa gituhoan nilang buhat nga di maayo.

"These acts have caused agony, inconvenience, and embarrasment to the residents who are mostly ordinary people living in a socialized housing project," suma nila sa ilang petisyon.

Si Dayanghiyang, human nadawat ang maong reklamo, dunay gipreparar nga privilege speech atol sa regular session kagahapon apan wala na mahisgoti sanglit giuna nila paghisgot ang Reproductive Health Ordinance.

"Madam President, the homeowners aver that these acts have caused agony, inconvenience and embarrassment to the residents. And it is in this regard I would like to refer the matter with the proper housing committee for appropriate action," suma ni Dayanghirang sa iyang suwat pahayag nga nahuptan sa Superbalita.

Sa pagsuwat ning balita, sa laing bahin, wala pa  nakahigayon ang Superbalita pagkuha sa pahayag sa mga opisyales sa HBNAI.