USA ka ginang ang nadala sa ospital human gipusil sa duha ka wa mailhing mga suspetsado didto sa Zamora Street, Barangay Poblacion, lungsod sa Monkayo, Comval Province.

Nailhan lamang ang biktima nga mao si alyas Lily, 30, temporaryong nagpuyo sa lungsod sa Monkayo.

Sa report gikan Comval Province Police Provincial Office nasayran nga nahitabo ang pagpamusil pasado alas 8:00 sa gabii niadtong Huwebes.

Samtang nagbaktas ang biktima pauli na unta sa iyang boarding house didto sa nahisgutang dapit, gisundan diay kini sa duha ka wa mailhing mga lalaking armado.

Samtang haduol na ang biktima sa giabangang boarding house, namatikdan niini ang nagsing-abot nga mga suspek.

Ang biktima nakahimo pa sa pagdepensa sa iyang kaugalingon, apan dimalas lamang tungod gipusil siya gamit ang kalibre .45 nga pistola.

Ang biktima nakahiagum og samad pinusilan sa kalawasan ug daling gidala sa ospital.

Samtang ang mga suspek abtik sab nga misibat padulong sa wa matinong lugar human sa pagpamusil.

Mga miresponding sakop sa kapulisan nakahipus og usa ka basiyo ug bala sa kalibre .45 nga pistola nga maoy gituohang gigamit sa mga suspek.

Kapulisan sa lungsod sa Monkayo pabiling blangko pa karon sa pag-ila sa mga suspek ug motibo sa pagpusil.

Dugang imbestigasyon gilusad sa mga otoridad may kalabutan sa hitabo.
Samtang manhunt operation ang gilusad aron sa pagpangita sa mga suspek. (Marvin Pineda)