PATAY ang usa ka mag-uuma human kini gitigbas, gidunggab ug giputlan pa og kinatawo didto sa probinsiya sa Cotabato.

Ang kapulisan nag-ila sa biktima nga si Rico Edillo, 56 anyos, minyo ug molupyo sa Purok Uno, Barangay New Cebu, Makilala.

Sa report gikan Cotabato Police Provincial Office, nasayran nga alas 5:40 sa hapon, Biyernes, nakit-an ang patay nga lawas sa biktima kilid sa sementeryo sa Makilala.

Ang lawas sa biktima nabulit sa samad tinigbasan, gibusdakan pa ang ulo niini og bato, wala pa matagbaw ang mga suspek giputol ang kinatawo niini ug gipakaon ngadto kaniya.

Matud ni Robilla, nga sa wala pa gipatay ang iyang uyoan may nakalalis kining mga tawo sa ilang dapit gumikan sa away sa yuta nga ilang giugmad.

Apan kadaghanan sa mga silingan sa biktima nagtuo nga mga miyembro sa New People's Army ang mipatay kaniya.

Sumala pa nga may atraso ang biktima sa usa ka babaye nga wala na nganli.

Gitahasan na ni Makilala Municipal Mayor Onofre Respecio ang kapulisan alang sa hugot nga imbestigasyon.

Gilauman nga sa dili madugay ma-establisar na ang tinuod nga motibo sa pagpatay sa mag-uuma, mailhan ug madakpan ang mga suspetsado. (Edgardo Fuerzas)