USA ka pulis ang gipusil sa tulo ka wa mailhing mga suspetsado samtang naglakaw pauli sa ilang bay sa ala 1:25 sa kaadlawong Sabado didto sa San Jose, SIR Phase I, Barangay 76-A Bucana, siyudad sa Davao.

Ang biktima mao si PO1 Joel Butch Tabios, 29, ulitawo, nadestino sa Regional Intelligence Unit (RIU) sa Police Regional Office (PRO) Region XI Camp Catitipan, nagpuyo sa San Jose, SIR Phase I.

Si SPO1 Reynaldo Gustilo, duty investigator sa Talomo Police Station, nagbutyag sa iyang investigation report nga naglakaw ang biktima niadtong higayona paingon sa ilang bay apan giatangan siya sa tulo ka mga suspetsado.

Matud ni Gustilo nga ang usa sa mga suspetsado kinsa nagsul-ob og kalo, mascara, ug itom nga T-shirt, kalit miabot og wa matino nga kalibre sa armas dayon gipusil ang biktima.

Si Tabios kinsa kompleto ang training nakabantay sa lihok sa mga suspetsado mao nga wa siya maintimano dihang gipusil ug naigo lamang sa iyang walang tiil.

Giingon nga nakadagan ang biktima paingon sa ilang bay mao nga wa na makahimo sa pagsunod kaniya ang mga suspetsado.

Mga suspetsado daling mibiya sa maong lugar paingon ngadto sa wala masayri nga direksyon gumikan sa kahadlok nga mobalos ang biktima.

Si Tobias nagpatambal sa iyang kaugalingon didto sa Davao Doctor's Hospital.

Gisusi na sa kapulisan ang mga anggulo nganong gipusil ang biktima sa mga suspetsado.