Gitigbas, kritikal

Saturday, March 20, 2010

KRITIKAL ang kahimtang sa usa ka driver human siya gitigbas sa dispatser sa alas 3:30 sa kaadlawon kagahapon didto sa Crossing Ulas, Barangay Talomo, siyudad sa Davao.

Ang biktima giila sa kapulisan nga mao si Jaypee Batoto, 18, ulitawo, nagpuyo sa Upper Rapnaga, Puan samtang ang suspetsado nailhan lang sa pangalan nga alyas Marson, nagpuyo sa Crossing Puan.

Have something to report? Tell us in text, photos or videos.

Base sa imbestigasyon ni Police Officer 2 Ronald Baguio sa Talomo Police Station, ang biktima nagsakay og jeep gikan sa downtown ug dihang miabot siya sa Crossing Ulas mikanaog si Batoto.

Pipila ka minuto ang milabay, suma sa imbestigasyon, mibalik pagsakay ang biktima sa gisakyan nga jeep apan gisundan siya sa suspetsado kauban ang laing upat ka wala mailhing mga tawo.

Samtang nakapahiluna na ang biktima sulod sa jeep, kalit siyang gihapsan og sundang sa suspetsado nga mitugpa sa iyang walang bahin sa ulo.

Si Batoto kinsa naigo sa iyang ulo nanalipud sa iyang kaugalingon nga iyang gisagang ang ikaduhang pagtigbas mao nga naigo ang iyang walang pulso.

Bisan nasamad ang biktima, suma sa mga nakasaksi, gitabangan siya og kulata sa upat ka mga kauban sa suspetsado hinungdan nga nakaangkon siya og daghang bun-og sa kalawasan.

Si Batoto daling gidala sa mga otoridad didto sa Davao Medical Center samtang ang mga suspetsado daling mibiya didto sa crime scene.

Samtang gitambalan ang biktima sa mga doktor, mga pulis nangita na sab sa mga suspetsado aron sayron ang ilang motibo, sikopon ug pasakaan og kaso ngadto sa korte. (AD)