USA ka lalaki ang midangat sa tambalanan human gitigbas sa iyang kainom didto sa dakbayan sa Panabo niatong Huwebes sa gabii.

Ang biktima mao si Anicito Ayco, 21, molupyo sa Purok 5, Barangay New Malitbog, siyudad sa Panabo samtang ang suspek mao si Olig Flores, hamtung ang panuigon, molupyo sa Barangay Waterfall, siyudad sa Panabo.

Suma sa blotter sa kapulisan, nasayran nga nahitabo ang pagpanigbas sa alas 9:30 sa gabii didto sa Barangay Kasilak, sa maong siyudad.

Giingon nga nag-inom ang biktima ug ang suspek sa nahisgutang dapit apan tungod kay nangahubog na sila, wa nakasinabot hinungdan nga nagkalalis ug misangko sa pagpanigbas.

Ang biktima nakaangkon og samad tinigbasan sa nawong ug sa iyang abaga mao nga gidala siya ospital aron patambalan.

Ang suspek, human sa hitabo, daling misibat padulong sa wa matinong lugar.

Giimbestigahan na karon sa kapulisan sa Panabo ang maong hitabo samtang gilusad sab ang manhunt operation aron sikopon ang suspek. (Marvin Pineda)