Granada gipanghasi

Sunday, February 7, 2010

USA ka hubog ang gibilanggo sa kapulisan human siya nanghasi pinaagi sa paghupot og granada sa ala 1:40 sa kaadlawon kagahapon didto sa Barangay Lapu-lapu, distrito sa Agdao, siyudad sa Davao.

Natanggong karon sa Sta. Ana Police Station mao si Ismael Getingan, 51, minyo, iskultor, nagpuyo sa Malasugui street, Barangay Lapu-lapu.

Have something to report? Tell us in text, photos or videos.

Si Getingan gisikop sa mga barangay tanod nga sila Danielo Godin, Gavino Paman, Alejandro Qui¤ones ug Carlos Cagas human nangayo og panabang ang mga molupyo sa maong lugar.

Nakuha sa mga barangay tanod ang usa ka granada ug ilang gi-endosar ngadto kang Police Officer 3 Danilo Daquigan nga didto sa ilang dapit.

Si Getingan nagbutyag sa Superbalita nga nag-inom sila niadtong orasa ug nagkinomedyahay lamang sila dala ang baseyo sa granada.

"Nagkomedya lang ko adtong higayona. Wala ko magdahum nga naay moabot nga mga barangay tanod. Mangayo unta ko og pasaylo sa mga pulis kay bisan og tan-awon nang granada, wala gyud nay sulod," suma ni Getingan.

Hilabihan ang pagmahay sa suspetsado sulod sa iyang selda samtang gihikay sa kapulisan ang tukmang kaso nga ipasaka batok kaniya.

Sa laing bahin, usa ka tawo ang midangat sa Davao Medical Center (DMC) human siya gidunggab sa iyang kainom sa alas 8:00 sa buntag niadtong Biyernes.

Ang biktima mao si Emon Bianca, 27, ulitawo, nagpuyo sa Purok Mangustin, Barangay Wines, distrtio sa Baguio, siyudad sa Davao.

Si Bianca nakaangkon og samad sa iyang likod dihang giluba ni Alex Cameniro, 40, mag-uuma ug nagpuyo sa Sitio Maligatong, Barangay Tawan-tawan, distrito sa
Baguio.

Ang duha giingon nga nag-inom kauban ang usa ka Renante Soliva apan nagkalalis sila sa wala masayri nga hinungdan, sigun sa imbestigasyon ni Police Officer 3 Roland Arado sa Baguio Police Station.

Ang suspetsado nasikop sab dayon sa kapulisan kinsa miresponde sa maong lugar ug gihulat nalang biktima aron ipasaka ang kaso ngadto sa korte. (AD)