PADAYON karong gilutos sa militar ug kapulisan ang grupo ni Kumander Lastikman, miyembro sa lawless Moro Islamic Liberation Front (MILF) group nga gitumbok nga responsable sa pagpamanhig didto sa barangay Batulawan Pikit, North Cotabato.

Ang insidente miresulta sa kamatayon sa usa ka inosenteng sibilyan, pagka-angol sa tulo ka mga kaubanan niini.

Gipamahayag ni Cotabato Police Provincial Director S/Supt. Norberto Batislaong nga si Kumander Lastikman nalambigit sa kasong extortion, carnapping, kidnapping ug highway robbery hold-up sa Weena Bus Line, lakip na pampubliko ug pribadong sakyanan nga moagi sa hilit nga dapit sa Cotabato ug Maguindanao Province.

Sumala pa nga kadaghanan sa mga priso nga miiskapo gikan Amas Provincial Jail nagtago-tago sa kampo ni Lastikman.

Andam nga mohatag og reward money si Cotabato Governor Jesus Sacdalan sa mga tawong makadakop o kaha makatudlo sa gilubluban sa grupo ni Lastikman.

Matud ni Pikit Chief of Police Senior/Inspector Elias Dandan nga duna na siyay mga sakop nga gipalihok uban ang mga ginsakpan sa 7th Infantry Battalion sa Philippine Army aron sudlon ang gitaguan sa mga rebeldeng tulisan.

Nagpasidaan si Sacdalan sa mga tawo nga mobiyahe panahon sa kagabhion sa Cotabato-Maguindanao highway nga dili gyud magkompiyansa kon alanganin na sa oras ug nagduha-duha.

Hinuon, nagpasalig si 6th ID Chief Major/General Alfredo Cayton nga magdugang pa og mga Army/Cafgu detachment sa mga hilit nga lugar sa probinsiya sa Cotabato ug Maguindanao alang sa seguridad sa katawhan. (Edgardo Fuerzas)