ANG Philippine Drug Enforcement Agency (PDEA) sa Autonomous Region in Muslim Mindanao mosagop sa "guerilla tactic" sa pagpakiggubat batok ginadiling druga, pahayag ni PDEA Armm Regional Director Superintendent Maldam Mocaram.

Usa sa mga paagi, matud pa ni Mocaram nga sagupon sa maong ahensiya mao ang pakigsandurot direktamente ngadto sa mga tiggamit ug tigpayuhot sa maong illegal nga druga sa matag barangay.

Miingon si Mocaram nga dinhi kinahanglang ihalad sa mga opisyal sa kabarangayan ug kalungsoran ang ilang dakong panahon sa pagkombinse sa ilang taga-barangay nga tiggamit o kaha tigbaligya sa gidiling druga sa paghunong na sa maong bisyo.

Kini pinaagi sa pagpakigtagbo kanila aron pasabton bahin sa kadautan sa ilang gihimo, dili lamang sa ilang kaugalingon kundili sa tibuok katilingban nga apektado niini.

Alang kang Mocaram nga mao kini ang labing epektibong paagi nga gitawag nga taktikang ginirilya sanglit ang matag tiggamit sa illegal nga druga naggikan man sa matag barangay.

Nasayod sab si Mocaram nga matag opisyal sa barangay maoy labing angayang masayod bahin sa mga tawo nga nanagbisyo sa ginadiling druga sa ilang lugar.

Diha sa maong kasayoran anha gamita sa mga opisyal sa barangay ang ilang abilidad sa pagpatawag og miting sa mga hingtungdan ug badlungon sa ilang gibuhat uban sa pagpasabot sa dili maayong epekto niini kanila ug sa katilingban.

Pinaagi sa hustong pagsabot kanila, dili na kinahanglang mogasto pa ang gobyerno og dakong kantidad sa pagpahigayon og komperensiya sa mga mahalon kaayong lugar unya ang motambong kadto rang mga tawo nga wala mag-apil apil sa maong bisyo.

Matud pa ni Mocaram nga ang pagpahigayon og mga pulong-pulong sa barangay sa pagpanguna sa kapitan sa barangay o si kinsa mang kasaligang opisyal niini dako kaayo og mahimo sa pagtabang sa kampanya batok sa illegal nga druga.

Unya dili sab kaayo madak-an og gasto ang gobyerno kay ang kasagarang patambungon niini mao ra man kadtong mga tawo nga apektado sa kalihukan sa ginadiling druga sama mismo sa tawong hingtungdan ug sa iyang mga ginikanan.

Mahimong anha ra sab kini ipahigayon sa barangay hall, basketball court, sports complex ug uban pang mga lugar sa matag barangay nga sayon ra kaayong pundukan sa mga taga barangay.

Miingon si Mocaram nga kon matuman kini sa mga opisyal sa barangay sayon kaayo nila ang pagmentinar sa pagsalig sa katawhan kanila ug sa ilang abilidad.

Alang kang Mocaram nga sa mga opisyal sa barangay nga bright kaayo mao kini labing maayong hagdanan nga sa matag karon ug unya mahimamat nila ang mga katawhan sa barangay ug ikapakita nila ang ilang katakus nga angayan gyud diay'ng piyalan sa katungdanan ug wala mausik ang ilang pagpapili kanila alang sa maong katungdanan. (Edgardo Fuerzas)