PATAY nang napalgan ang usa ka ice drop vendor samtang naghigda ibabaw sa freezer sud sa factory nga iyang gitrabahoan niadtong Biyernes.

Ang biktima mao si Ramil Cinco, 45, ulitawo, lumad nga taga Sto. Tomas, Davao del Norte, stay-in worker sa factory nga gipanag-iyahan ni Benjamin Econar didto sa Purok 37, Malanos street, Calinan Poblacion, siyudad sa Davao.

Si Econar midangop sa Calinan Police Station aron ipahibalo nga ang iyang trabahante napalgan nilang wa nay kinabuhi sa alas 6:00 sa buntag.
Human nasayud ang kapulisan sa Calinan, nagpadala dayon sila og imbestigador aron susihon ang dapit diin napalgan ang biktima.
Si PO3 Calamba kinsa nag-imbestiga sa maong hitabo nagsulti nga iyang nasuta nga ang biktima natulog ibabaw sa freezer ug wa na nakamata nianang pagkabuntag.

Matud ni Calamba nga ilang nasayran gikan kang Edward Resutay, kauban sa biktima, nga nagmulo ang biktima nga sakit kaayo ang iyang ulo sa 2:00 sa kaadlawon.

Si Cinco giingon nga gitambagan sa iyang kauban nga tarungon ang iyang higdaan aron di mosakit ang iyang ulo ug makatulog siya og tarong.
Sa ilang pagmata sa alas 5:00 sa buntag, ilang nadiskubrehan nga wa na magginhawa ang biktima mao nga ilang gipahibalo ang ilang agalon.

Nasayran nga kaniadto nasakit ang biktima og tuberculosis ug dihang naayo na siya mibalik na sab sa iyang mga bisyo, suma sa asawa ni Benjamin nga si Arlene Econar.

Sa paghiling sa mga otoridad sa patay'ng lawas, ilang nasuta nga way timailhan nga gituyo ang kamatayon sa biktima.

Gituhoan nga namatay ang biktima gumikan kay giatake sa sakit sa kasing-kasing.

Ang patay'ng lawas sa biktima atua karon sa Angel Funeral Homes sa Calinan. (AD)