KAALYADO lang ni House Speaker Prospero Nograles ang makahimo sa pagpapatay sa kaalyado sa Hugpong sa Tawong Lungsod sigun ni Mayor Rodrigo Duterte.

"They were bad news from the start," ni Duterte kinsa nagtumbok nila Alliance for National Democracy (Anad) congressman Jun Alcover ug Bantay party-list congressman Jovito Palparan, isip mga kaalyado ni Nograles.

Ang mayor nagsulti nga ang presensiya nila Alcover ug Palparan sa siyudad sa Davao sarang na nga siya maalarma.

"I know their capacity," suma ni Duterte dihang gipakisayran sa mga local media human sa iyang rally didto sa Barangay Catalunan Pequeño.

Si Duterte namahayag human miguwa ang pito ka mga tawo kinsa mikanta niadtong Miyerkules nga sila Alcover, Palparan, ug pipila ka mga tawo maoy nagpaluyo sa mga pagpanghasi sa siyudad, lakip na ang planong pagpatay sa 14 ka mga barangay kapitan, Davao City Overland Transport Terminal chief Yusoph Jimlani, ug kanhi City Administrator Wendel Avisado, nagpapili isip konsehal sa unang distrito.

"The moment I heard from the intelligence community that they (Palparan and Alcover) are staying in the city, I was prompted to request that the city be placed under the control of the Commission on Election (Comelec)," pahayag ni Duterte.

Sa affidavits sa pito ka mga tawo nga gisumite sa Comelec-Davao, naglambigit nila Alcover, taga Cebu City; Palparan sa Metro Manila; kanhi police director Eduardo Matillano sa Puerto Princesa City; usa ka Daniel Hortalueza, alias Danny Suarez ug negosyante nga dunay codename nga MC or Mike Cuevas, ug Corporal Aldrin Cabunilla gikan sa Metro Manila.

"Hortalueza aka Danny Suarez identified 14 barangay captains who are confirmed allies of Mayor Rodrigo Duterte (as targets of the plot). He said they they were promised a reward of P500,000 per head if they liquidated Col. Jimlani as the 2nd top target and me as the number one target. Guns and ammunitions were provided by Lito Alcover," ni Attorney Wendel Avisado atol sa gihimong press conference didto sa Grand Men Seng Hotel.

Si Comelec-Davao Director Ray Sumalipao, human madawat ang reklamo, nagbutyag nga ilang imbestigahan ang maong reklamo.

Sa bahin sab ni Alcover dihang gihinabi sa tulumanong Banat sa ABS-CBN, siya nagbutyag nga dili ilang binuhatan ang pagpanghasi nga nahitabo dinhi sa siyudad.

Si Alcover nagsulti nga siya nagtuo nga kabahin sa plano sa Hugpong sa Tawong Lungsod ang mga nagapanghitabo sa siyudad sukad niadtong gitamnan og bomba ang City Hall ug Central Bank, pagdagit ug pagpatay sa mga campaigners sa Bantay Partylist ug paglabay og mga granada sa balay sa mga kapitan nga kaalyado sa Hugpong.

Ang maong kongresista nagsulti nga wala silay rekord nga mopatay og tawo. Siya naghagit sa mayor nga ipasaka ang kaso ngadto sa korte sanglit andam nilang atubangon ang rebelasyon sa pito ka mga tawo nga nahimo nilang mga supporters. (AD)