Kandidato pagka konsehal gi-ambush patay

Monday, February 8, 2010

USA ang patay, duha ang naangol sa pagpamanhig didto sa siyudad sa Cotabato.

Ang kapulisan nag-ila sa biktima nga nakabsan sa iyang kinabuhi nga si Joseph Datuwata, 44 anyos, minyo, negusiyante ug kandidato pagka-konsehal.

Have something to report? Tell us in text, photos or videos.

Angol sab ang iyang mga anak nga sila Saira ug Kagi Esmael, ug mga molupyo sa LR Sebastian Street.

Sa taho gikan sa Cotabato City Police Office, nasuta nga alas 7:15 sa buntag, Lunes, nahitabo ang pagpamusil.

Ang biktima samtang paggawas sa iyang pinuy-anan sakay sa usa ka Isuzu frontier aron ihatud ang iyang mga anak sa tulunghaan, kalit lamang kini nga giharang sa duha ka wala mailhing suspek.

Ang biktima gilayon nga gipaulanan og mga bala gamit ang .45 nga pistola.

Bisan og samdan si Datuwata, nakahimo pa siya sa pakigpinusilay, gigukod ang mga mamumuno.

Apan tungod wa grabeng samad pinusilan nga naangkon, wala na kalahutay ang biktima, nabangga ang iyang gimanehong sakyanan sa poste sa kuryente.

Dali sila nga gisapupo sa mga mirespondeng pulis ug gidala sa Cotabato Regional and Medical Center.

Apan gideklara si Datuwata sa mga attending physician nga dead on arrival samtang anaa sa talandugong kahimtang ang iyang mga anak.
Gipahayag ni Cotabato City Police Director Senior Superintendent Willie Dangane nga duha ka anggulo ang ilang gisundan sa hitabo.

Una, selos sa negosyo, ikaduha may kalabutan sa pulitika.

Padayon sab ang operasyon sa mga otoridad sa paglutos sa mga mamumuno.
Mismong si Cotabato City Mayor Muslimin Sema nagmando sa kapulisan, nga tutukan ang kaso, dungan sa tumong nga madakpan ang mga tawong nagpaluyo sa krimen. (Edgardo Fuerzas)