KANHING sakop sa militar nadakpan human namaligya og armas sa probinsiya sa Cotabato.

Ang kapulisan nag-ila sa suspek nga mao si M/Sgt. Helardo Mayo, ug molupyo sa sitio Cabisig, barangay Poblacion, Magpet.

Sumala sa taho gikan sa Cotabato Police Provincial Office nga banda alas 11:00 sa buntag, Hulyo 2, gironda sa hiniusang puwersa sa Magpet PNP ug 69th Infantry Battalion sa Philippine Army ang pinuy-anan sa suspek, kinsa gitumbok nga nalambigit sa gun running syndicate sa Central Mindanao.

Apan ang suspek misukol sa mga otoridad ug nakigpinusilay hinungdan nga naigo sa iyang paa ug dughan.

Dali nga gidala ang suspek sa Kidapawan Doctors Hospital. Apan pipila ka minuto gibalhin sa Davao Medical Center gumikan sa ka-grabe sa iyang samad.

Matud ni Cotabato Police Intelligence Chief S/Supt. Jose Calimutan nga dugay na nila gisundan ang suspek. Gani namaligya pa kini og tag-as nga matang sa armas ngadto sa mga inilang negusiyante ug miyembro sa New People's Army.

Bisan si Magpet Municipal Mayor Efren Piñol nakadawat og taho nga namaligya og armas si Mayo.

Ang kapulisan sa Magpet nakarekober og mga tag-as nga matang sa armas, mga bala ug mga kagamitan sa paghimo og hinagiban.

Mga otoridad padayon nga nangita sa mga kauban sa suspek aron patubagon sa sala nga ilang nahimo. (Edgardo Fuerzas)