DUHA ka mga habal-habal drayber ang gibiktima sa wala mailhing mga carnappers sa duha ka managlahing lugar dinhi sa siyudad sa Davao.

Ang usa ka biktima gipusil sa carnappers samtang ang usa nakalingkawas dihang nakadagan palayo niadtong Miyerkules.

Gitambalan karon sulod sa Davao Medical Center (DMC) mao si Antonio Gutierrez Romillano, 43, minyo, ug nagpuyo sa El Rio Vista Subdivision, Barangay 19-B Poblacion.

Si Romillano nagbutyag sa kapulisan nga alas 12:00 sa tungang gabii gisakyan siya og duha ka mga tawo gikan didto sa Bacaca ug nagpahatud didto sa Gem Village, Barangay Maa.

Matud ni Romillano nga dihang miabot sila didto sa Gem Village imbes mobayad ang iyang pasahero gitionan hinuon siya og armas.

Tungod sa maong hitabo, misukol ang biktima hinungdan nga gipusil siya tumong sa aping. Si Romillano midagan palayo ug nangayo'g panabang didto sa Barangay Hall sa Maa.

Mga carnappers, suma sa biktima, daling mibiya sa maong lugar ug gisakyan ang iyang Honda Wave nga dunay plate number LH-6015.

Samtang nakalingkawas sa mga carnapper human gitionan og kutsilyo mao si Gerson Formentera, 18, nagpuyo sa Pag-ibig Village, Barangay Dumoy.

Si Formentera nagbutyag sa kapulisan nga gisakyan siya og duha ka mga pasahero sa alas 7:00 sa gabii didto sa GTH, Barangay Toril Proper.

Mga pasahero unang nagpahatud didto sa Rosalina VIllage, Barangay Baliok apan dihang miabot sila sa maong lugar nagpahatud na sab didto sa Catalunan Pequeño.

Dihang miabot sila sa hilit nga lugar, suma sa biktima, gipahunong siya sa mga carnappers ug gitionan siya og kutsilyo.

Ang biktima daling midagan palayo mao nga nakahigayon ang mga carnappers pagmaneho sa Yamaha Crypton nga dunay plate number LR-1888.

Alas 11:00 sa gabii, dihang gilusad ang manhunt operation, narekober ang motrosiklo sa maong lugar sanglit wala miandar ug tungod sa tabang sa nakasaksi sa krimen nasikop ang suspetsado nga si Ramil Abadines, 20, nagpuyo sa Toril Poblacion.

Mga sakop sa Talomo Police Station nag-andam na sa tukmang kaso nga ipasaka batok kang Abadines samtang naningkamot sab masikop laing mga carnappers sa duha ka mga insidente sulod sa ilang area of responsibility.