NANINGKAMOT karon ang kapulisan nga mailhan ug masikop ang tinuod nga mga karnaper sa sakyanan sa usa ka Korean national niadtong Nobyembre 1, 2009.

Ang maong sakyanan giparada sulod sa Sta. Ana Wharf niadtong Oktubre 31 apan sa paghibalik sa tag-iya nawala na ug didto na nabawi sa Barangay Silang, Padada, Davao del Sur niadtong Biyernes.

Ang sakyanan usa ka Toyota SUV nga dunay plate number WKU-329, dunay chassis number KF80-8014506 nga gipanag-iyahan ni So Ok Song, 46, negusiyante ug nagpuyo sa Ladislawa Village, Barangay Buhangin Proper.

Base sa progress report sa Sta. Ana Police Station, ang maong sakyanan narekober nila pinaagi sa tabang sa mga pulis nga sakop sa Matanao Police Station.

Ang sakyanan napalgan samtang gibilin kini didto sa balay sa magtiayong Serillo Cervantes sa Barangay Bagong Silang, Padada, Davao del Sur.

Giingon nga giilisan og laing plate number (LFL-782) ang maong sakyanan samtang ang orihinal nga plate number niini gitagoan sulod sa sakyanan.

Ang magtiayon nagbutyag sa kapulisan nga igo lang gibilin ang maong sakyanan nila Jerzfil Labuyo Subigya ug Elizabeth Padillo, nagpuyo sa Kilometro 68, Barangay Camanchiles, Matanao, Davao del Sur.

Sila dugang nagsulti nga ang duha nangita og buyer sa maong sakyanan mao nga giparada lang una sa ilang balay samtang wala pa mopalit niini.

Ang sakyanan positibong giila sa tag-iya pinaagi sa plate ug chassis number niini.

Atua karon sa Sta. Ana Police Station ang sakyanan samtang gisusi pa ang pagkahanaw niini aron masilotan ang mga tinuod nga karnapers. (AD)