USA ka empleyado sa usa ka telecommunication company sa buhatan sa Department of Transportation and Communication ang gisikop human nasakpang naghupot og gidiling druga atol sa gilusad nga buy-bust operation sa mga otoridad didto sa Purok 9, Poblacion, lungsod sa Nabunturan, Comval Province, Martes sa udto.

Ang dinakpan giila nga si Abdulrashid Casamira, 38, ug molupyo sa Purok 9.

Sa nahagpat nga report gikan sa Comval Province Police Provincial Office nasayran nga nasikop sa mga sakop sa Nabunturan Municipal Police Station ang suspek pasado alas 12:00 sa udto atol sa gilusad nga buy- bust operation.

Usa ka pulis ang nagtakuban nga mopalit og shabu sa suspek gamit ang P700 nga marked money.

Sa dihang nasuta nga dunay dalang shabu ang suspek, dali kining gisikop ug giposasan sa mga pulis.

Nasakmit gikan sa suspetsado ang wa pa matinong gidaghanon sa gituohang shabu.

Nakuha sab gikan sa suspek ang kwarta nga gihimong marked money, cellphone niini ug mga personal nga gamit.

Ang suspek ang temporaryong gitangong sulod sa selda samtang gihikay na sa kapulisan ang kasong ipasaka batok kaniya.

Ang kapulisan sa lungsod sa Nabunturan mihimo na og dugang imbestisgasyon sa hitabo.