Kay nalingaw sa away ni Pacquiao, iyang bay ugdaw

Monday, March 15, 2010

TUNGOD kay nalingaw sa away ni People's Champ Manny Pacquiao ug Joshua Clottey niadtong Domingo, wala nabantayan sa usa ka tawo nga misilaob ang iyang balay samtang naglantaw sa telebisyon sa iyang silingan didto sa Barangay Tigatto, siyudad sa Davao.

Ang sunog nahitabo sa ala 1:30 sa hapon nga nagsugod sa balay ni Jovito Calihog didto Sto. Niño, Hillside, Purok Alike, Barangay Tigatto.

Have something to report? Tell us in text, photos or videos.

Si Cahilog giingon nga nalingaw sa away sa duha ka mga boksingero apan samtang nagpungasi ang kinumo ni Pacquiao, gilamoy na sab diay sa kalayo ang iyang balay.

Ang kalayo daling mitapon sa panimalay nila Bernardo Rebaya, Demetrio Sab Jr., Pacita Blanca ug Domingo Lazara.

Si Police Senior Inspector Arnulfo Mahinay sa Buhangin Police Station nagbutyag sa iyang spot report nga mikabat sa P24,000.00 ang danyos sa maong sunog.

Tungod sa maong hitabo, si Mahinay nagpahimangno sa mga molupyo sa maong lugar nga mag-amping kanunay aron makalikay sa sunog.

Sulod sa lamang sa duha ka adlaw, 13 na ka balay ang nasunog lakip niini ang walo ka mga balay ang nasunog sa alas 5:00 sa hapon kagahapon didto sa Blk. 22, Piapi, Barangay 22-C Poblacion, siyudad sa Davao.

Nagsugod ang kalayo sa balay ni Julito Carcuevas ug mikuyanap ngadto sa panimalay nila Adurno Saturino, Leonor Blanco, Francisco Lasala, Dodong Kinamut, Dayala Pili, Valentino Albino ug Cresensio Bitos.

Misilaob ang kalayo sa balay ni Carcuevas human misiga ang wiring sa kuryente, sigun sa imbestigasyon ni SPO2 Cesar Robles sa Sta. Ana Police Station. (AD)