USA ka konduktor sa L300 Van gipusil, patay sa siyudad sa Cotabato. Ang kapulisan nag-ila sa biktima nga si Bado Samal, 42 anyos, minyo ug molupyo sa Balabagan, Lanao Del Sur.

Base sa nakutlo nga impormasyon gikan sa Cotabato City Police Office nga banda alas 4:00 sa hapon, Nobyembre 9, samtang nagtindog ang biktima duol sa terminal sa L300 Van sa Jose Lim Street, giduol kini sa duha ka wala mailhing mga tawo ug gipusil gamit ang kalibre .45 nga pistola.

Patay diha dayon si Samal nga natusak-tusak sa bala ang nagkadaiyang parte sa iyang lawas samtang ang mga mamumuno abtik nga misibat sakay sa XRM nga motorsiklo paingon sa wala matino nga dapit.

Matud ni Usman Dinda, usa ka drayber, nga maoy naka-saksi sa pagpusil sa biktima nga wala gyyd nila mailhi ang mga mamumuno gumikan kay naka-helmet sila ug kalit kaayo ang hitabo.

Gipahayag ni Cotabato Police Director Supt. Willie Dangane nga una gipatay ang biktima nakadawat kini og hulga sa iyang kinabuhi gumikan sa kaaway sa ilang pamilya sa probinsiya sa Lanao Del Sur kabahin sa yuta nga ilang gi-ugmad.

Ang kapulisan milusad na og imbestigasyon aron masuta kinsa ang mga suspek ug madakpan. (Edgardo Fuerzas)