PATAY ang usa ka konduktor sa usa ka de pasaherong dyip sa probinsiya sa Maguindanao.

Ang kapulisan nag-ila sa biktima nga si Oscar Tamerio, 39, minyo, ug molupyo sa South Upi.

Subay sa taho gikan sa Maguindanao Police Provincial Office nga banda alas 4:00 sa hapon, Hulyo 3, sakay ang biktima sa usa ka double tire nga depasaherong dyip gikan sa siyudad sa Cotabato.

Apan sa dihang duol na sa South Upi, nakalalis sa konduktor ang duha ka wala mailhing pasahero tungod kay kuwang ang gibayad nga pamasahe. Sa dihang gisita sa biktima ang mga suspek, nasuko kini ug gipusil siya gamit ang kalibre .45 nga pistola.

Patay gilayon ang biktima human maigo ang iyang ulo ug dughan. Samtang mga mamumuno dali nga mi-eskapo paingon ngadto sa wala matino nga direksyon.

Gipamahayag ni South Upi Mayor Beds Gampong nga problema sa ilang dapit ang mga armadong grupo nga sagad dili mobayad kon mosakay sa mga depasaherong dyip.

Hinuon, gitin-aw ni Gampong nga duna na silay gisundan nga mga suspek sa nahisgutang hitabo.

Ang kapulisan padayong nag-imbestiga aron mailhan ug madakpan ang mga suspetsado. (Edgardo Fuerzas)