NAKAANGKON og ubay-ubay ka mga samad pinusilan ang usa ka konsehal sa lungsod human gipusil sa wala maila nga suspetsado samtang pauli na kini sa ilang puloy-anan niadtong Huwebes sa hapon sa Barangay Bagocboc, lungsod sa Opol, Misamis Oriental.
Giila ang biktima nga mao si Opol Councilor Cecelio Abuhan, residente sa susamang barangay kinsa nakaangkon og samad sa iyang ulo, liog ug dughan nga maoy hinungdan sa iyang kamatayon.
Si Senior Inspector Alwen Baclao, hepe sa Opol Police Station, niingon basi sa ilang inisyal nga imbestigasyon nga kadto lamang nga adlaw nga walay kauban si Abuhan nga miuli sa ilang puloy-anan nga nagbaklay.
Tungod kay wala may nakasaksi sa insidente gituohang giatangan kini sa mga armado ug gipusil gamit ang 9mm nga pistola ug kalibre 45 human nahipos kini sa crimes scene.
Nagbuy-od ug naligo sa iyang kaugalingong dugo si Abuhan nga dunay upat ka samad sa ulo, samad liog ug samad pinusilan sa dughan diin mga fatal area ang naigo sa pistola.
Matud ni Baclao nga ilang paningkamotan ning panahona nga ma establisar ang motibo sa pagpatay.
Migawas ang report nga daw nalambigit kini sa illegal nga pagmina apan matud ni Baclao nga sukad sa iyang paglingkod wala siyay nadawat nga report nga nalambigit kini sa illegal hinuon ila kining imbestigahan.
Usa sab sa gitouhan mao ang kontra sa pulitika nga posibleng adunay kasuya ninii.
Apan gibutyag ni Baclao nga wala pa siya nahimong hepe sa maong lungsod si Abuhan kanunay na nga makadawat og pagpanghulga nga patyon gikan sa grupong New People’s Army ug gani daw gipuntirya kining usa sa likidahon.
Matud ni Baclao nga kining tanan ilang imbestigahon aron maila ang suspetsado sa labing madaling panahon.
Hustisya
ANG asawa ni konsehal Abuhan nga mao si Margelina Abuhan kinsa kasamtangan nga barangay kapitan sa Bagocboc nangayo gyod og hustisya sa kamatayon sa iyang bana.
Giangkon niini nga makadawat og hulga ang iyang bana apan gabalewalaon niini tungod kay tinguha man niining makaserbisyo og ayo sa katawhan sa lungsod.
Gibutyag usab niini nga kaniadto pa nga barangay kapitan iyang bana daw daghan na gakasuya niini tungod sa kadaghan nga improvement nga nahitabo sa barangay ug gani niining nahimo na kining konsehal sa lungsod mas daghan gyod kini og nahimo labina dinha sa mga hinterland barangay.
Taliwa dili niya bout motumbok kinsay nihimo niini gilauman niining ilang makab-ot ang hustisya sa labing madaling panahon labina wala niya gidahom ang hinanaling kamatayon niini.
Samtang sa iyang bahin, si Opol Mayor Maximo Seno nibutyag nga bisan dili niya kapartido si Abuhan apan iyang gipasalig nga moabag sa panginahanglon niini ug gimando na niini sa kapulisan nga paspasan ang imbestigasyon.
Daw taliwala bug-at kini nga kaso kay wala matumbok ang suspek apan gahulat siya unsa ang resulta sa imbestigasyon sa kapulisan ug gihinaot niining masulbad ang krimen.
Si Seno namahayag usab nga posibleng adunay nagdumot sa biktima hinungdan nga gipatay kini.
Kahinumduman tuig sab 2013 gironda ang panimalay ni Abuhan sa mga sakop sa Criminal Investigation and Detection Group (CIDG) tungod sa gikatahong paghupot niini og daghan nga armas apan walay nakita ang kapulisan.
Sa pagkakaron, ang patayng lawas anaa sa Bollozos Funeral Parlor kinsa gikatakdang ihaya sa munisipyo sa lungsod sa Opol usa dalahon didto sa Barangay Bagocboc sa sunod nga adlaw.