Kotse mi-dive sa kanal

Tuesday, February 9, 2010

USA ka lalaking nagmaneho og kotse ang nadala sa ospital human mi-dive sa kanal ang iyang sakyanan didto sa Barangay Guadalupe, lungsod sa Carmen, Davao del Norte, Lunes sa gabii.

Giila ang biktima nga mao si Mervyn Talcos, hamtung ang panuigon, ug molupyo sa Barangay Sto. Niño, dakbayan sa Panabo.

Have something to report? Tell us in text, photos or videos.

Sa report gikan sa Carmen Municipal Police Station nasayran nga pasado alas 8:00 na sa buntag napalgan ang sakyanan sa biktima nga misawom sa kanal daplin sa highway didto sa nahisgutang barangay.
Sa inisyal nga pakisusi sa mga otoridad nasuta nga nagmaneho sa iyang KIA pride Sedan hatchback ang biktima nga dunay plate number LCY-788.

Gikan ang biktima sa dakbayan sa Tagum pauli na unta sa dakbayan sa Panabo dihang nahitabo ang disgrasya.

Sumala sa mga nakasaksi nga kusog ang dagan sa sakyanan sa biktima ug gikatahong mibuto ang ligid sa atubangan hinungdan nga misarasay kini ug miambak sa kanal.

Ang biktima nahiagum og mga pangos ug bun-og sa nagkadaiyang parte sa iyang lawas nga dali sab nga gidala sa Davao Medical School Foundation Hospital sa dakbayan sa Davao.

Samtang ang sakyanan sa biktima maayo kaayo nga pagkalumping, nabuak pa ang mga salamin tungod sa kusog nga pagkadasok niini sa kanal.

Kapulisan sa lungsod sa Carmen mihimo na og pakisusi sa hitabo. (Marvin Pineda)