Laborer natusak sa samad

Wednesday, April 28, 2010

NATUSAK-TUSAK ang kalawasan sa usa ka laborer human siya gidunggab sa usa ka drayber sa alas 7:00 sa gabii niadtong Martes didto sa Barangay Tawan-tawan, distrito sa Baguio, siyudad sa Davao.

Ang biktima mao si Boboy Lamonay, hamtong ang pangidaron samtang ang suspetsado mao si Isabelo Guardiana, 42, ug pulos nagpuyo sa Sitio Sumpitan, Barangay Tawan-tawan.

Have something to report? Tell us in text, photos or videos.

Ang spot report sa Baguio Police Station nagpahibalo nga
ang motibo sa maong insidente mao lamang ang diyutay nga panagbingkil sa duha ka wala gikabutyag nga hinungdan.

Si Lamonay nakaangkon og daghang mga samad sa iyang kalawasan nga miresulta sa iyang kamatayon samtang ang suspetsado boluntaryong mitahan sa iyang kaugalingon ngadto sa ilang barangay police nga si Lito Bulacito.

Ang suspetsado personal nga gi-endosar ni barangay kagawad Philip Saladio ngadto sa Baguio Police Station samtang ang biktima atua karon gihaya sa Angel Funeral Homes.

Ang kasong murder giandam na aron ipasaka ngadto sa City Prosecutor's Office (CPO).

Sa laing bahin, duha ka mga entertainers sa videoke bar nga naglalis bahin sa ilang trabaho ang mitugpa sa tambalanan samtang ang usa mitugpa sa selda sa Talomo Police Station.

Ang biktima mao si Analou Cartin, 19, dalaga, nagpuyo sa Phase 1, SIR Matina samtang ang suspetsado mao si Jennifer Dela Cruz, 18, dalaga ug nagpuyo sa Barangay Sasa, ning siyudad.

Si PO3 Dominador Vitor, duty investigator, nagbutyag nga nga alas 11:30 sa gabii niadtong Martes nagkalalis ang duha sulod sa VIP Room 20 sa E.T. KTV Bar nga nahimutang sa Ecoland.

Matud ni Vitor nga ang panaglalis sa duha miresulta sa pagpanunggab hinungdan nga naigo si Cartin sa iyang liog ug walang bahin sa lawas.

Ang biktima daling gidala sa iyang mga higala didto sa Limso Hospital samtang si Dela Cruz gidala sa selda sa kapulisan sa Talomo. (AD)