USA ka "laborer" ug usa ka "waitress" ang gipamusil sa wala mailhing mga tawo sa duha ka managlahing insidente dinhi sa siyudad sa Davao.

Ang laborer gideklarar nga dead on arrival sa Brokenshire Hospital samtang ang waitress gideklarang 'under observation' sulod sa Davao Medical Center (DMC).

Unang gipusil sa alas 10:45 sa gabii niadtong Martes mao si Philip Mediano Daborbor, alyas Balintin, 23, ulitawo, ug nagpuyo sa Purok 2, Rasay Extension, Barangay 6-A Poblacion.

Base sa imbestigasyon ni PO2 Danilo Alngog sa San Pedro Police Station, ang biktima nag-inusarang naglakaw didto sa Rasay Street pauli na sa ilang balay apan gisundan siya sa wala mailhing mamumuno.

Si Alngog nagbutyag sa iyang spot report nga wala nakabantay ang biktima dihang kalit siyang giduol ug gipusil sa iyang dughan.

Ang biktima daling gidala didto sa Brokenshire Hospital sa pamasin nga
matabang pa, apan dimalas kay nakabsan siya sa iyang kanabuhi dihang miabot sa tambalanan.

Nakuha sa kapulisan ang usa ka basiyo sa bala sa .45 kalibre nga pistola nga maoy gigamit sa mamumuno kinsa daling miikyas gikan sa crime scene.

Mga kabanay sa biktima miangkon nga dunay pagkabadlungon ang maong biktima apan nagsulti nga dili kadto igong rason aron nga patyon siya.

Ikaduhang gipusil sa alas 2:00 sa kaadlawon kagahapon mao si Ronalyn Joy Calzado, 25, dalaga, lumad nga taga Negros Occidental ug nagpuyo sa Sunrise Village, Barangay Matina Crossing.

Si Calzado nagsakay og trisikad pauli na unta sa ilang balay gikan nag-duty sa Onyeng Angel Videoke House sa Matina Crossing apan dihang miabot sila sa Sunrise Village gisundan sa duha ka mga tawo nga nagsakay og motorsiklo.

Ang biktima kalit gipusil sa angkas sa motorsiklo tumong sa iyang walang aping ug milapos sa tuong dalunggan.

Ang drayber sa trisikad nga si Cedrick Urdaneta na ang nagpahibalo sa kapulisan bahin sa nahitabo sa iyang pasahero.

Si Calzado nakahimo pa sa pagpangayo og panabang sa ilang mga silingan mao nga gidala siya didto sa DMC.

Mga imbestigador sa San Pedro ug Talomo Police Stations nagsusi na sa maong hitabo aron sayron ang motibo ug ilhon ang mga responsable sa maong krimen.