TAGUM CITY -- USA ka lalaki nangayo og pakitabang sa presinto sa kapulisan human gitulis sa mga naka-motorsiklong tulisan didto sa dakbayan sa Tagum, Domingo sa kaadlawon.

Ang biktima giila nga si Francis Paul, 23, molupyo sa Purok Sunshine, Barangay Visayan Village, susamang siyudad.

Sa sumbong sa biktima nga nakutlo sa blotter sa kapulisan nga samtang nagbaktas siya didto sa Purok Mangga sakop sa Barangay Visayan Village atbang sa buhatan sa Cruztelco ug pauli na unta siya sa iyang balay, duha ka wa mailhing mga lalaking armado ug wa pa matinong kalibre sa armas ang miduol kaniya ug gitionan siya og pusil dayon deklara og hold-up.

Sa kahadlok nga pasakitan sa mga suspek, way nahimo si Paul kun di ang pagtugyan na lamang sa iyang Sony Ericsson ug Nokia nga cellphone ug pitaka nga dunay sulod nga kwarta.

Human milampus sa tinguha mga suspek dali nga misibat sa lugar sakay sa usa ka motor.

Sumala sa biktima nga ang mga suspetsado nagsakay sa usa ka motor nga nagbatun sa plaka numero IW 6840.

Igo na lamang sa pagdangop sa presinto ang biktima sa pamasin nga mauli pa ang mga butang nga nakuha kaniya. (Marvin Pineda)