NATANGGONG karon sa selda sa kapulisan ang usa ka lalaki kinsa nangawat og bisikleta nga gipanag-iyahan sa lokal nga kagamhanan sa siyudad Davao sa alas 5:00 sa hapon niadtong Biyernes.

Nabilanggo mao si Carlos Casares, 20, dayo sa Rizal Park human niya gikawat ang bisikleta ni Jomary Taranza, hamtong ang pangidaron, street sweeper sa City Environment and Natural Resources Office (Cenro), nagpuyo sa Purok 4, Barangay 76-A Bucana, siyudad sa Davao.

Suma sa blotter sa San Pedro Police Station, si Casares gisikop sa mga sakop sa Mobile Patrol Group (MPG) nga sila PO3 Piel ug PO1 Vargas.
Matud nila Piel ug Vargas nga ilang gisikop ang suspetsado human nila nasiplatan nga misakay na kini sa bisikleta ni Taranza nga giparada lamang didto sa Rizal Park.

Si Casares gidala sa duha ka mga pulis didto sa presinto sa San Pedro Police Station ug didto nasayran nga siya diay ang nagkawat sa bisikleta sa gobyerno nga gi-isyu ngadto kang Vargas niadtong buwan sa Mayo 2009.
Giingon nga giparada lang ni Vargas ang iyang bisikleta sa maong lugar ug sa iyang pagbalik gikambiyohan na ang iyang bisikleta.

Miangkon si Casares nga iyang giprenda ang bisikleta ni Vargas sa Ros-Ver Pawnshop didto sa Buhangin ug hangtud karon wa pa malukat.
Ang kagamhanang lokal sa Davao namalit og bisikleta nagkantidad og P18,000.00 ang matag usa aron ipagamit sa mga sakop sa Cenro ug City Mobile Patrol Group (CMG) sa Davao City Police Office (DCPO).

Tungod kay mahalon ang maong bisikleta, init kaayo sa mata sa mga kawatan sama ni Taranza. Giandam na karon sa kapulisan ang kasong theft batok sa suspetsado. (AD)