Lalaki nga armado dakpan

Tuesday, February 9, 2010

USA ka lalaki ang gisikop human nasakpang naghupot og armas sa dakbayan sa Tagum, Lunes sa buntag.

Ang dinakpan nailhan lamang sa ngalang Matignanos, 50, ug molupyo sa siyudad.

Have something to report? Tell us in text, photos or videos.

Sumala sa report gikan sa blotter sa kapulisan nga pasado alas 9:00 sa buntag nasikop sa mga sakop sa Tagum City Police Station ang suspek atubangan sa may Eagle's View Hotel sa dakbayan sa Tagum.

Nakuha sa mga otoridad gikan sa dinakpan ang usa ka kalibre .357 revolver nga dunay unom ka mga buhing bala.

Natiktikan sa mga otoridad ang suspek samtang nagdala og armas didto sa dapit hinungdan nga gisikop dayon kini.

Hinuon wa gilimod sa dinakpan ang paghupot niya og armas kay proteksyon matud pa niya sa iyang kaugalingon tungod kay nagtrabaho siya sa usa ka bulawanan.

Matud sa biktima nga giprenda lamang kaniya ang maong armas.

Tungod way gikapakitang legal nga papeles ug exemption gikan sa Comelec gisikop dayon ang suspek.

Kasong illegal possesion of firearms in relation to election gun ban ang gisagpa batok sa suspek. (Marvin Pineda)