USA ka 22 anyos nga lalaki ang napalgang patay na samtang natabunan og dakong bato ug gipalutaw sa Miral River didto sa Sitio Trinity, Barangay Managa, lungsod sa Bansalan, Davao del Sur.

Mga alas 8 sa buntag, adlaw'ng Sabado, dihang nakuha ang patay'ng lawas sa biktima nga nanimaho na tungod nadugta na ang lawas ug halos di na mailhan human panga na lang sa nawong niini ang nahibilin.

Nakit-an sa Sun. Star Superbalita, nga nahiagom kini og mga samad dinunggaban sa dughan ug natanggal na ang mga panit samtang nagluko.

Sumala sa mga molupyo sa lugar nga maayo na lang nga may tawong nanguha og baki sa maong sapa niadtong Biyernes sa gabii, ug nataho dayon ang insidente.

Gitataw ni Chief Inspector Solomon De Castilla, hepe sa kapulisan, uwahi na dihang giila ni Jomar ang biktimang igsuon nga si Ryan Estrada, taga didto ra usab sa maong lugar.

Sumala pa nga taud-taud nang nawala ang biktima didto sa ilang panimalay sanglit giingong aduna kini mental disorder apan wa makatuo ang pamilya nga mao kini ang iyang dangatan.

Si Jomar Estrada, nga gihinabi sa Superbalita kagahapon sa buntag, nitataw nga Oktubre 4 pa nawala ang iyang manghod ug gikan niadto wa na nila kini igkita mao nga kada adlaw silang nangita sa biktima.

"Mosuol-suol man gud niyang sakit pero tarong man siya mo-istorya, gani barkada niya didto sa bukid mga Cafgu man ug sundalo," matud ni Jomar.

"Usahay magsubay-subay man gud ni siya sa lasang, unya atong Agosto man gud nagsiyagit-siyagit ni siya unya nay ginganlan nga mga NPA," pasabot ni Jomar.

Nanaghap ang kapulisan nga duha ka semana ng gipatay ang biktima hinungdan nga di na makaya ang kabaho niini nga anaa na sa 3rd degree sa state of decomposition.

Luyo niini, ipailawom gihapon sa otopsiya ang patay'ng lawas sa biktima aron masuta ang rason sa iyang kamatayon. Tumong usab nga mailhan ang mga tawong mipatay kaniya. (Dondon Dinoy)