NAKURAT ang katawhan Sabado sa buntag dihang ilang napalgan ang kaputol sa lawas sa usa ka tawo nga naglutaw sa lapyahan sa baybayon didto sa Punta Dumalag III, Barangay Matina Aplaya, siyudad sa Davao.

Base sa blotter sa Talomo Police Station, napalgan ang ubos nga bahin sa lawas tawo sa alas 5:30 sa buntag pinaagi ni Jessie Javines, 42, molupyo sa Punta Dumalag.

Si Javines, human niya nakita ang kaputol sa lawas sa tawo, nanawag dayon sa Central 911 aron ugkaton ang parte sa lawas ug imbestigahan sa kapulisan.

Ang Central 911 mitawag dayon sa kapulisan sa Talomo mao nga miresponde sila PO2 Ariel Iriarte ug PO2 Ronald Baguio aron susihon ang mga taho.

Ang parte sa lawas sa tawo nagsul-ob og green nga short pant ug gituhoan nga gilabay siya sa dagat sa wala mailhing mamumuno mao nga gihimo karon sa kapulisan ang makuting imbestigasyon.

Ang parte sa lawas sa tawo gidala sa mga otoridad ngadto sa Angel Funeral Homes sa dalang F. Torres, siyudad sa Davao.

Gisusi sa Superbalita ang maong punerarya kagahapon sa hapon aron sayron kung dunay kabanay nga mihipus sa parte sa lawas sa biktima apan ang tagdumala nagbutyag nga wala pay bisan usa nga miadto sa punerarya.