USA ka unit sa Krizia taxi ang naugdaw human mibuto ang tangke sa Liquefied Petroleum Gas (LPG) samtang nagdagan sa alas 10:30 sa buntag niadtong Sabado.

Ang insidente nahitabo atubangan sa Angel House Hardware sa Crossing Ulas, Barangay Talomo Proper, siyudad sa Davao.

Ang taxi nagdala sa plate number LWK-714 nga gimaneho ni Banito Dulce Amora, 58, minyo, nagpuyo sa New Loon, Barangay Mintal, distrito sa Tugbok.

Sa imbestigasyon ni SPO1 Policarpo Ballenas sa Talomo Police Station, si Amora nagbutyag nga samtang nagdagan ang iyang gimanehong taxi sa maong lugar iyang namatikdan nga miaso ang panel board niini.

Suma sa mga nakasaksi sa maong insidente, ang drayber mihunong dayon misunod ang masipang buto sa tangke sa LPG mao misilaob ang maong taxi.

Mga sakop sa Talomo Fire Station daling miresponde sa maong insidente mao nga napalong ang kalayo.

Mga bombero nagsulti nga mokabat sa P60,000.00 ang kantidad sa danyos sa maong sunog.

Mga imbestigador nagbutyag nga electrical faulty wiring ang hinungdan sa maong sunog busa nagpahimangno sila sa tanang mga drayber nga sigurohong maayo ang mga wiring sa ilang mga sakyanan sa dili pa mobiyahe.

Dunay nahinabi nga mga pasahero sa taxi ang Superbalita ug sila nagbutyag nga delikado nga sakyan ang mga sakyanan nga migamit og LPG sanglit mobuto ang tangke niini.

Gawas pa nga dako ang posibilidad nga masunog ang sakyanan ug maangin ang pasahero, sila nagbutyag nga delikado pa sa panglawas sa mga pasahero sanglit makalabad sa ulo ang baho sa LPG.

Hinuon, ang ilang gipanulti base lamang sa ilang obserbasyon samtang nagsakay sila og mga sakyanan nga LPG ang gigamit, apan wala pay sayantipikong pagtuon nga gihimo bahin sa epekto niini. (AD)