Magprangkahay Kita

SI Senador Noynoy Aquino nakatakdang magpahibawo sa iyang hukom--modagan ba o dili-- pagka Presidenti sa nasud alang sa 2010 nga presidential elections bisag unsang adlawa sud ning buwana.

Sa miaging mga adlaw milibot siya sa pipila ka mga dapit sa nasud, apil na ang Davao, aron magpakitambag sa mga tawo nga suod sa iyang banay bahin sa sugyot sa daghang mga tawo nga padaganon siya.

Gawas sa mga tawo nga nag-aghat kaniya nga molansar, si Aquino labaw nga nadasig nga mokandidato human mihatag kaniya og higayon si Senador Mar Roxas kinsa mao unta ang nagplano nga modagan pagka Presidenti sa partido Liberal.

Adunay mga nagtuo nga dako og ikatabang ang pag-kandidato unya ni Aquino sa paghiusa sa partido oposisyon.

Sa pikas bahin usab sa kampo sa administrasyon, si Presidenti Gloria Macapagal Arroyo mibirig na kang Vice President Noli de Castro kinsa iyang gihangyo nga modagan atbang ni bisan kinsa nga molansar sa oposisyon.

Wa hinuon mikakak si Noli apan wa pa makita sa katawhan nga intresado gayud siya sa posisyon. Gawas niini, samtang tinuod nga kusog siya sa mga survey apan daghan ang dili bilib sa abilidad ug katakus ni Noli.Dunay mga nagsulti nga dili mabuhat ni Noli ang mahimo ni Teodoro.

Atong masabtan nga si Presidenti Arroyo nangita gayud karon og dumadaog nga manok aron adunay modupa kaniya human unya siya mokanaug sa iyang posisyon.

Kun pananglit tinuod ang hugon-hugon nga modagan si Arroyo pagka kongresista sa Pampanga labaw na nga kinahanglan niya nga ang Presidenti iyang manok aron maoy magpaluyo kaniya unya sa iyang tinguha nga mahimong Speaker sa kongreso.

Apan samtang si Noli gihunghongan na ni Arroyo, ang mikabat sa 49 ka mga provincial governors nga sakop sa League of Provinces of the Philippines (LDP) nga nagtagbo niadtong miaging adlaw, human sa mosyon ni Sarangani Governor Nigs Dominguez, nagpadayag sa ilang pagpaluyo kang Defense Secretary Gilbert Teodoro isip ilang kandidato pagka pangulo.

Kun ugaling si Aquino maoy mapili nga modagan sa pundok sa oposisyon ug si Teodoro ang mahukman nga mokandidato sa administrasyon nindot kini nga bugno sa politika.

Magtakus sila si Benigno Coquangco Aquino III ug Gilbert Coquangco Teodoro Jr., pulos mag-agaw.

Ang Lakas-Kampi CMD gikataho nga magpahibawo kinsay ituboy nga standard bearer niini karong Septyembre 15.