MURAG dili sayon kining umaabot nga piliay sa 2010 alang sa pamilyang Cagas sa Davao del Sur. Kini gumikan kay adunay mga lig-ong politiko nga moatbang kanila.

Sa unang distrito sa dakbayan sa Digos si Kongresista Marc Cagas, anak ni Governor Dodo, gikabaniog nga atbangan ni Presidential Adviser Jesus "Jess" Dureza. Dili kini lalim nga bugno sa politika tungod kay siguradong makaguba sa hinapay ni Marc si Jess.

Si Jess sakop sa partido sa administrasyon nga Lakas-Kampi CMD busa matabangan siya sa ngilngig nga makinaryas sa administrasyon.

Gawas niini, sama sa mga Cagas, duna sab kaugalingong salapi si Jess.
Kun kasinatian sa pag-serbisyo ang hisgutan lisud malupigan si Jess tungod kay naghupot na siya og mga dagko ug bug-at nga katungdanan sa gobyerno sugod pa sa administrasyon ni kanhi Presidenti Fidel Ramos ug hangtud karon sa pamunoan ni Presidenti Gloria Macapagal Arroyo.

Kini ang unang termino ni Marc isip kongresista.

Sa trabaho isip kongresista sa kamara baha, si Jess nga usa ka bar topnotcher, dili sab mahimong esmol-esmolon kay gawas nga nakalingkod na siya sa kongreso kaniadto, maantigo siya ug kugihan.

Sa pagka gobernador, adunay mga ngalan nga mitumaw karon nga modagan batok ni incumbent Governor Dodo Cagas.Niadtong miaging adlaw, gitaho sa Superbalita nga sila si Digos City Mayor Arsenio Lataza, kanhi Kongresista sa 2nd District sa Digos Claude Bautista, Ist District Board Member Erwin Llanos ug Jose Abad Santos Mayor Alexander Wangkay nga nailhan usab nga si Zander Khan modagan pagka gobernador apan gihuwat lamang ang pag-uyon sa ilang tagsa-tagsa ka partido.

Gawas ni Governor Dodo ug Congressman Marc, magpasubli sab ang kapikas sa gobernador nga si board member Mercedes. Sa ato pa tulo sila ang managan sa piliay sa 2010. Ambot kun di ba kini bintaha sa ilang mga kaatbang kun 'campign resources' ang hisgutan.

District 2 lu-ag na

Sa distrito 2 sa siyudad sa Davao tulo ka mga konsehal ang mogradwar tungod kay naka-tulo na sila ka termino mao nga dili na makadagan sa susamang posisyon.
Ang tulo mao sila si konsehal Dado Mahipus, Danny Dayanghirang ug si Susabel Reta. Sa tulo, si Dado ug Danny gikataho nga modagan pagka kongresista sa distrito 2 samtang si Mrs. Reta giingong mopahuway una sa politika.

Tungod kay tulo ka mga konsehal ang di na makadagan sa susamang posisyon ninglu-ag karon ang dag-anan sa ubang managanay.

Si Abogado Ben Orcullo usa niadtong modagan pagka konsehal. Napili si Ben nga konsehal kaniadto ug sud sa iyang pagserbisyo way ikasulti nga dautan ang mga niboto kaniya.

Si Ben, kun di ko mosipyat, modagan sa bando sa Team Nograles.