Luciano: Fixer sa drug test center

Friday, September 3, 2010

PAGBANTAY sa mga marama nga "fixer" nga nag-atang sa mga tawo diha sa gawas sa Land Transportation Office (LTO) dinhi sa siyudad sa Davao.

Niadtong Martes miadto ko sa drug test center diha tapad sa LTO tungod kay nagpa-drug test alang sa renewal sa akong driver's license.

Have something to report? Tell us in text, photos or videos.

Post your reaction to the Manila hostage crisis

Pagkanaog ko sa sakyanan, gisugat ko sa usa ka putot nga fixer ug gipangutana unsay tuyo.

Dihang akong gisultihan nga magpa-drug test ko, mihanyag dayon siya og "tabang" pinaagi sa paggiya kanako padung sa patigayon nga naghimo sa drug test.

Apan mibalibad ako sa rason nga nakatultol ko busa di ko kinahanglan ang "serbisyo" niya. Wa mipatuo ang pandak nga fixer nag-una hinuon nako ug pag-abot sa taas sa buhatan nga naghanyag og drug test mikuha og silya kay palingkoron ko ug mikuha og porma luyo sa akong pagsupak. Dihang misuway na siya sa pagpasabot nako unsay isuwat sa porma, ako siyang gisultihan nga di nako kinahanglan ang iyang "serbisyo" tungod kay makama-o ko mosuwat, mobasa ug makasabot sa nahipatik sa porma.

Aron ako undangan sa putot, ako siya gipakita sa akong company ID sa Sun Star Davao. Apan nagyawyaw siya nga wa nahadlok bisag asa ko nagtrabaho.

Hinuon, usa ka edaran ug tarong nga tawo nga susama og sekyu sa drug test center ang miduol nako ug gisultihan ako sa pag-fill-up sa porma aron makapa drug test na.

Ang akong gikalibgan nganong nitugot ang drug test center nga mogamit og fixer. Ang fixer mahimo siguro alang niadtong mga "no-read no write" apan alang niadtong dunay kaalam di sila kinahanglan. Buot bang ipasabot nga mas makasabot og eninglis kadtong putot nga fixer kaysa nako?

Nganong wa man sab giabog sa LTO ang mga fixer nga nagtambay diha sa gawas sa ilang opisina?

Duna na ko'y leksiyon ug sa sunod higayon nga magpa-renew ko og lesensiya mangita na ko sa ubang drug test center nga way mga fixer, barato pa.

Ang akong gibayaran sa drug test P350 samtang sa uban diay P250 lang. Never again!

Disiplina

Atong pahalipayan dinhi ang mga pulis nga matinud-anon sa serbisyo.

Niadtong miaging adlaw dihang nisiga ang red light sa traffic signal light didto duol sa pedestrian overpass sa kanhi DMC, Bajada akong nasaksihan ang abuso sa usa ka drayber.

Tungod kay pula ang color sa suga nihunong ang mga sakyanan. Nakita ko usab sa akong likod pinaagi sa salamin ang police mobile car.

Samtang pula pa ang suga, usa ka drayber sa multicab wa na kahuwat nga mag-green light ang suga ug nipasirit og dagan.

Nakita kini sa pulis sa akong likod ug gipasagdan lang usa.

Dihang misiga na ang green light, giunhan ko sa police mobile car ug akong gi obserbahan unsay buhaton sa pulis.

Gi-unhan sa pulis ang drayber nga gahi og ulo ug gipakanaog, gidakop.

Wa na kita masayud unsay sunod nga nahitabo apan maayo ang gibuhat sa pulis nga di palabyon ang abuso aron maka-leksiyon ang mga tawo nga abusado!

* * *

Happy birthday kang Kongresista Karlo B. Nograles nga nagsaulog sa iyang birthday kagahapon.