HUMAN si Cesar Mancao nahiabot dinhi sa nasud aron pagbarug isip saksi batok ni Senador Panfilo Lacson sa Dacer-Corbito double murder case, nagtuo kita nga anaa siya sa custody sa National Bureau of Investigation.

Gibutang siya ubos sa custody sa NBI tungod sa gikataho nga bahad sa iyang kinabuhi.

Apan samtang kadaghanan kanato nagtuo nga anaa siya sa poder sa NBI, dunay taho nga miabot sa Superbalita nga ang kanhi opisyal sa pulis milibot sa lainlaing lugar sa Monkayo ug nakiglamano sa mga tawo.

Ang pagpakighimamat ni Mancao sa katawhan kabahin sa iyang plano nga pagdagan pagka kongresista sa district 1 sa Compostela Valley Province.

Ang kongresista karon sa district 1 mao si Manuel "Way Kurat" Zamora apan tungod kay last term na kini niya iyang padaganon ang iyang anak nga si Maricar.

Sa sinugdanan si Vice Governor Ramil Gentugaya ang nagsurang-surang nga modagan pagka- kongresista sa Monkayo apan nahilot kadto aron di mabungkag ang panaghiusa sa partido nga gipangulohan ni Governor Arturo "Chungkee" Uy. Dihang nawala na sa hunahuna ni Maricar Zamora Apsay ang hulagway ni Gentugaya, misud sa eksena si Manlalaban Jaime "Jun" Lopoz Jr., usa ka kanhi Ombudsman Graft Investigator Officer.

Nagtuo kita nga wa kaayo tagda ni Way Kurat ang giplanong pagdagan ni Lopoz. Apan dihang mibutho si Mancao sa eksena sa politika, gituhoan nga naghinoktok ang atong higala nga si Way Kurat.Wa ta gisulti dinhi nga nalisang siya apan naghunahuna unsay maayong buhaton.

Dunay mga nagsulti nga kun makagasto si Mancao way tihik-tihik ug kini nakamugna og pangutana kun diin siya og salapi nga sa dugay'ng panahon ditinado man siya didto sa Amerika ug paghiabot dinhi sa Pilipinas wa man siya'y trabaho.

Duna ba siya'y daghang natigom nga salapi o dunay gamhanan ug sapiang tawo nga nagpaluyo kaniya?

Si Mancao usa ka national figure. Dihang mitindog siya isip saksi batok ni Senador Lacson, ang iyang ngan halus kanunay nahipatik diha sa mga nag-unang pamantalaan.

Dili basta-basta ang kahasol nga iyang nahatag ngadto ni Lacson, iyang kanhi Superior officer sa PAOCTF. Masulti ta sab nga nakapahuway sila si Presidenti Gloria Macapagal Arroyo ug First Gentleman Mike Arroyo gikan sa mga birada ni Lacson human mihatag og testimonya si Mancao batok sa senador. Dako kining butang alang sa Palasyo. Naibtan sila'g tunok.

Sa miaging mga tuig way undang ang tira ni Lacson kang Presidenti Arroyo ug ni FG Mike. Nagkapuliki ang magtiayon sa pagpanagang ilabi na kay kanunay hagbong ang presidenti sa mga survey.

Apan dihang gitudlo na ni Mancao si Lacson nga suspek sa Dacer-Corbito double murder case, nahilom ang senador, murag piso nga nabasa.

Ang gihimo ni Mancao perwisyo alang ni Lacson apan kalinaw sa panghunahuna alang sa mga nagpuyo sa Palasyo.

Ang pangutana karon- kinsay nagpaluyo sa kandidatura ni Mancao?