Mag-uuma gitigbas sa kumpare, patay

Saturday, March 20, 2010

PATAY ang usa ka mag-uuma human gitigbas sa iyang kumpare didto sa probinsiya sa Cotabato.

Kapulisan nag-ila sa biktima nga mao si Dario Felipe, 37 anyos, minyo, molupyo sa Purok 6, Tulunan.

Have something to report? Tell us in text, photos or videos.

Base sa taho gikan Cotabato Police Provincial Office, alas 4:20 sa hapon, Biyernes, ang biktima nakig-uban og inom sa iyang kumpare nga si Reynold Patricio.

Ang duha nagtagay-tagay samtang nalingaw og istoryahanay. Apang dihang nangahubog na, kalit nga miulbo ang lalis gumikan sa kanhi nilang bikil.

Nagbinayluay sa mahait nga pulong ang duha.

Tungod sa tumang kasuko, wa ka-antus si Patricio mikuha kini og mahait nga sundang ug gitagud-tagud sa pagtigbas si Felipe.

Dihang nakita sa suspek nga nagkadugo na ang biktima, dali sab siyang miiskapo paingon sa wala matino nga direksiyon.

Nadala pa si Felipe sa iyang pamilya sa Tulio Favali Hospital apan gideklara ra sab kini sa mga mananambal nga patay tungod sa ubay-ubay ka mga samad tinigbasan sa nagkadaiyang parte sa iyang lawas.

Ang kapulisan sa Tulunan padayong nag-imbestiga aron madakpan ang suspetsado samtang giandam na ang tukmang kasong kontra sa suspek. (Edgardo Fuerzas)