PATAY ang usa ka mag-uuma human gipusil sa iyang pag-umangkon didto sa probinsiya sa Cotabato.

Ang kapulisan nag-ila sa biktima nga mao si Alberto Kiro, 47 anyos, minyo, ug molupyo sa barangay Kapayawi, Libungan.

Base sa taho gikan sa Cotabato Police Provincial Office, alas 6:20 sa gabii, Pebrero 7, samtang naglakaw ang biktima gikan sa iyang uma pauli sa iyang bay nahitabo ang pagpusil kaniya.

Sa imbestigasyon nga gihimo nasuta nga gisugat ang biktima sa suspek, dayon gipusil sa .45 nga pistola.

Bisan samaran si Kiro, nakahimo pa kini sa pagdagan, ug nangayo'g pakitabang sa iyang mga silingan.

Samtang ang suspek dali nga misibat paingon sa wala matino nga direksyon.
Ang biktima gitabang ug gidala sa iyang pamilya sa Cotabato Regional and Medical Center, apan pipila ka oras ang milabay, nakabsan sa iyang ginhawa tungod kay grabe ang samad pinusilan sa iyang dughan ug likod.

Apan sa wala pa mamatay ang biktima, naka-istorya niini ang iyang pag-umangkon ug nagtug-an kinsay mipusil kaniya.

Matud sa paryente nga si Edna, nga sa wala pa nahitabo ang krimen, nakalalis sa biktima ang suspek gumikan sa bikil sa yuta nga ilang giugmad.

Gitahasan na ni Libungan Mayor Manuel Dela Cerna ang kapulisan sa pagsikop sa suspek nga nagtago-tago na karon, human gipatay ang iyang uyuan. (Edgardo Fuerzas)